LES STATUES DE SIMON DROUIN
Cejourdhuy 6° jour d’aoust mille six cent seize, furent presens en leurs personnes, par devant le tabellion au duché de Lorraine soubsigné et tesmoins cy apres denommez, hault et puissant seigneur Joachin Charles Emmanuel comte de Tornyelle, Brione, Salarol et de Chalant, baron de Bauffremont et grand maistre de l’hostel et surintendant des finances de Son Altesse, et ce pour et au nom d’Icelle d’une part et Simon Drouin, tailleur demeurant a Nancy d’autre part, lesquels ont volontairement recognu et confessé avoir faict traité, convenu et accordé entre eulx les marchez et conditions qui s’ensuyvent, scavoir, que ledit Drouin a promis et sera tenu de faire à ses propres fraiz et despens, pour le service de Sadite Altesse, quatorze statues de pierre de Sabvonnière en Partois pour mettre et poser au jardin derriere le chasteau de Sadite Altesse a Nancy, ensemble, quatorze niches et piedestal toutes de pierre de Pont-a Mousson pour poser lesdictes statues, qui representeront : Diane avec un griffon aupres d’elle et la hur d’un cerf, Jupiter tenant un fouldre en mains avec une aigle aupres de luv, Flora tenant un chapeau de fleur en main, Hercules tenant une masse d’une main et une peau de : lyon de l’aultre. Junon avec ung poron aupres d’elle, Pâris tenant une pomme en main. Cerès tenant une cille en main et aupres de soy une gerbe de bled, Mars tenant un coutelas en main et de l’aultre une targue, Orphée tenant une lire, Adonis tenant une javeline en main, avant ung dogue d’un costé et de l’aultre une hur de sanglier, Vulcain tenant ung marteau d’une main et de l’aultre appuyé sur un heaume posé sur une enclume, Apollon tenant un arc en mains, Minerve tenant une lance d’une main et une targue et Venus avant un Cupido aupres d’elle. Touttes lesquelles quatorze statues auront sept pied et demy en haulteur de pierre de Sabvonniere en Partois. et seront icelles chacune d’une seule piece, sy ce n'est que pour la perfection d’icelles ledit Drouin soit contraint v adjouster quelques petites pieces; les niches pour mettre lesdictes statues seront de dix piedz de haulteur et quatre de large et seront faictes de pierre de taille du Pont a Mousson ou du | ont Sainct Vincent, comme aussy les piedestal seront faictz de la mesme
pierre et auront ung pied et demy de haulteur auquel sera gravé le.nom de la statue posée sur iceluy, lesquelles, ensemble les niches, piedestal et aultre besongne a ce necessaire ledit Drouin a promis et s est obligé rendre le tout fait et parfait deuement et fidellement, a dit d’expertz et gens a ce cognoissans, a ses propres fraiz, comme dit est, dans deux années a commencer des la datte du present traité, pourquoy faire commencera a y travailler incessamment, et cours apres aultres et continuer jusques a l’entier accomplissement et perfection desdits ouvrages, moyennant ce que ledit seigneur comte a promis de faire paier et delivrer audit Drouin la somme de quatre cent vingt cinq frans pour chacune statue, niche et piedestal rendus, posées a leur perfection et ses p'eres predictes, revenant le tout audit pris a la somme de six mille trois cent frans, monnaie de Lorraine, sur et en tant moins de laquelle ledit Drouin a confessé avoir receu par advance dudit seigneur comte audit nom la somme de cinq cent frans dite monnoie de laquelle il s’est tenu contant et bien païié, le reste d’icelle somme luy sera paié et fourny a mesure et proportion que lesdites statues se feront et seront posées en leurs lieux, sous lesquelles conditions ont promis et promettent lesdites parties respectivement par leurs foidz, scavoir, ledit Drouin de bien deuement et fidellement rendre faitz et parfaitz lesdits ouvrages dedans lesdits deux ans, au contentement de Sadite Altesse, a peine de tous despens, dommages et interestz qu’a faulte de ce pourront arriver, obligeant à cest effect tous et un chascun ses biens meubles et immeubles presens et advenir partout, les submettant aux juridictions, forces et contrainctes de tous lieux et justice, pour sur iceux faulte d’accomplissement de ce que dessus y estre exploite reellement et ne fait comme pour chose cognuë et jugée en jugement contradictoire, et pour meilleure asseurance audit seigneur comte tout cesdits ouvrages, restitution des sommes receues par ledit Drouin que de tous les interetz qu’a faulte de la perfection desditz ouvrages ou altrement Sadicte Altesse pourrait supporter, maistre Jean Vincent marchant et François Bourbonnois peintre, tous deux bourgeois de Nancy, estant a ce faire presens, lesquels de leur bonne que pure, franche et libre volonté se sont constituez pleisges et caution et principaulx satisffacteurs et rendeurs dudit Drouin. Et a cest effect en ont obligé tous leurs biens meubles et immeubles aux mesmes submissions et execution susdictes, reconceans ledit Drouin et sesdictes cautions au bene‘ice de division, ordre de discution, a l'exception du premier requis et fhter-
pellé, et a tous garendz, arrier-garendz et a toutes aultres exceptions contraires a ces presentes; et ledit seigneur comte audit nom de faire paier ledit Drouin, ainsi qu’il est cy dessus specifié, a peine de tous depens, dommages et interestz. Faict et passé a Nancy les an et jour predict, presens honnorables Nicolas Jacob demeurant à Luneville et Claude Bartelemy domestique au sieur de Girmont, conseillier auditeur des comptes de Lorraine, presens. Ainsi signé : J. E. Charles de Tornielle, D. Perrin, Simon Drouin, Jean Vincent et François Bourbonnois.
La presente copie a esté extraite et collationnée sur sa minutte principale, a laquelle elle se concorde de mot à mot. Tesmoing le seing manuel du tabellion soubscrit cy mis a Nancy ce sixieme iour de mars mille six cent dix sept.
