ADRESSEE AU ROI DE FRANCE LOUIS XII ET X LA REINE ANNE DE BRETAGNE

Demande de la main de la princesse Claude pour le jeune Charles d'Autriche,

( Minute.)

\ ers vous, sire, roy très-chrestien , et vous dame, roynne très-excellente, sommes venus par l'ordonnance de voz très-humbles cousin et cousine, monseigneur l'archiduc et madame l'archiduchesse d'Aus-

triche, prince et princesse de Castille, etc., lesquels nous ont chargié, après vous avoir fait leurs très-humbles recommandacions, vous dire et declairier la continuation de l'entier et parfait amour qu'ilz ont à voz très-nobles et très-dignes persoenes, aussi la grande affection et ardent désir qu'ilz ont de tousjours l'augmenter de tout leur pouvoir. Et pour y parvenir ont mis avant leur iceulx trois consideracions, dont la première est, en ensuivant la doctrine d'un des enseignemens que le prince des philosophes, Aristote, entre aultres, donna au roy Alexandre le Grand, que à tous biens publiques est chose nécessaire d'avoir sotieté et confédération avec ceulx qui sont très-puissans et qui soient voisins, affîn que tost et promptement, au besoing, l'un puisse secourir l'aultre et estre l'un à l'autre utile et prouffitable. Oultre, ont considéré qu'il n'y a sotieté ou confédération plus conjoincte, plus convenable, plus certaine et assceurée que celle qu'est contraicté selon Dieu et nature, qu'est celle qui se fait par lien de

saint mariage.

La tierce que, communément en contractant les mariages, l'on a regard à quatre choeses : bonté, beaulté, noblesse et richesse.

Sy se sont, après lesdites considérations bien posées, comme bons et saiges princes, desirans pourveoir à leur postérité, leurs seigneuries, pays et subjectz, finablement advisés de se allier avec vous, sire, qui estes très-puissant et voisin, par confédération qu'est selon Dieu et nature , assçavoir mariage à celle qui a les quatre qualités dessusdites, bonté, beaulté, noblesse et richesse, qui est madame Claude de France, vostre belle à présent unicque, que Dieu, le souverain duquel tous biens procèdent, par sa divine clemense vous a donné, avec leur filz à présent seul et unicq, monseigneur le duc Charles de Luxembourg, infant et prince de Castille, correspondant en eage et aux qualités dessusdites.

Et à ceste fin, sire, nous ont despeschiés nosdits seigneur et dame archiduc et archiduchesse, du sceu, gré et consentement de trèshaulx, très-puissant et très-excellent princes, roy des Romains, roy et roynne de Castille, leur seigneurs père et mère, et envoie vers

vous et madamme la roynne très-excellente, avec pouvoirs d'eulx souffisans ad ce servans pour le plus affectueusement et très-humblement j)rier et requérir que vostre très-noble plaisir soit leur accorder la persoene de madite dame Claude, vostredite belle , pour la donner espouse et femme légitime , elle venue à puberté , à mondit seigneur Charles de Luxembourg, leur filz.

Sy vous supplions, sire, et vous, madame très-excellente, en toute humilité, monsieur de Saint-Andrieu , représentant la persoene de monsieur de Bourbon \ et ad ce par luy commis, monsieur le gouverneur de Bourgogne, monsieur le prince d'Orenges, comme parens et cousins , et nous aultres comme conseilliez , serviteurs et ambassadeurs ad ce députés par lesdits seigneurs roys et roynne, archiduc et archiduchesse, que vostre très-noble plaisir soit leur accorder leur honneste requeste.

Sire, et vous, damme très-excellente, de la part des seigneurs et dames, roys et roynne dessusdits, tant affectueusement que faire pouvons, vous mercions de celle de monseigneur l'archiduc et madamme sa compaigne très-humblement et de la nostre, tant qu'il nous est impossible l'exprimer.