LES VERS DU MONDE

Mondes mauves, nous sommes doi, Cors et âme, cui t'as féru À mort et de venin peu :

Fols est qui a fiance en toi.

Mondes , li venins que je bui A ton hanap, quant à toi fui, Dont tout me truis envenimé, Samble chascun plésant en lui Dusqu'à donc qu'il connoist l'anui, Le domage et la povreté, Que l'âme i prent et l'enferté; Mes quant connoist ta fausseté, Adonc te het et aime autrui :

Cil qui plus se sont délité En toi servir, plus ont musé, Quar servi ont ne sèvent qui.

Mondes , cil par a trop perdue La connoissance et la véue Qui en toi se fie de riens ; T'es une voie sanz issue; L'entrée est parée et vestue De délices plaine de fiens, D'orgueil , de beuban , c'est li biens Que tu fez savorer les tiens.

Covoitise i est maintenue, Et toute chose qui est niens.

Mondes , tu pais cels que tu tiens D'une viande qui les tue.

Mondes, cil qui à toi s'avoie