En agréant toujours l’excuse qu’elle lui donnoit

2<)6 Roman

la douleur qu’il sentoit nuyt et jour, en lui renouvellant les doulx et gracieux plaisirs qu’ilz avoient emsemble euz ou temps passé , en lui remettant à mémoire la foy et la promesse que elle lui avoit faitte; et la reprenoit gracieusement du grant séjour que elle avoit fait avec les Greux.

Et avecques ses lettres lui manda Pandaro en esperance qu’il lui feroit tenir sa promesse quant il aura parlé à elle. Et lui mesmes semblablement eut volunté par pluseurs foiz de y vouloir aller en habit dissimulé , en guise de pelerin ou autrement, par quoy il ne fust point congneu. Mais puis après se reprenoit , disant qu’il ne savoit façon que tant se peust desguiser qu’il ne fust congneu. Et si d’avanture il estoit apperceu en tel estât , il seroit perdu et diffamé. Pandaro , en la fin, ne rapporta d’elle autre chose que belles parolles et grans promesses sans nul effect ; dont Troïlus commança à présumer que c’estoit folie d’avoir plus d’esperance et de mettre en doubte ce que estoit vroy, et qu’il n’estoit pas le premier qui en tel cas avoit esté pugny à tort et sans cause. Et à celle heure vit et congneut que à bon droit y avoit souspeçon; il congneut lors clèrement que nouvelle amours estoit cause des mençonges que elle lui donnoit à entendre et de l’entretenement que elle lui faisoit ; car il estoit certain que l’amour du père, ne chière, ne festiement que on luy sceust faire, ne avoient autant de puissance de faire rompre à Brisaïda la promesse que elle lui avoit faitte. Et tousjours pensoit comme il pourroit savoir plus clèrement de son malheureux songe. Mais amours ne lui laissoient point encore du tout en tout

perdre le esperance , car comme souvent ' il advient que celui qui ayme à paine croist chose qui lui soit contraire ou viengne à desplaisir. Et toutesvoies estoit tout vroy de Dyomedes, comme en peu de temps advient ung cas qui lui monstra clèrement la vérité , par lequel il perdit toute la creance qu’il avoit eue jusques alors.

Ainsi estoit Troylus en grant tourment de ses amours. Si advint un jour qu’il y eut une fière et dure rencontre entre les Troyens et les Creux, à laquelle fut Dyomedes richement abillé, et avoit sur son harnois une riche cothe , laquelle Deiphebus gaingna ce jour par force de armes. Et après la besoigne faicte, s’en retourna, liez et joyeux , en la ville de Troye , de ce qui lui estoit advenu , et Dyomèdes en fut durement corroucé. Ainsi comme Deiphebus entroit en la ville et que on lui portoit celle cote qu’il avoit oslée à Dyomèdes, Troïlus sourvint, lequel le louoit fort sur tous autres de ce qu’il avoit fait ce jour, et aproucha de celuy qui le portoit pour le veoir mieulx. Et ainsi comme il regardoit d’un costé et d’autre, il vit ung fermail d’or qui estoit ataché, lequel on povoit veoir et oster de la dicte cote. Il le congnut tout incontinent comme celui qu’il avoit donné à Brisaïda à l’eure que avecques grant douleur il print conçé d’elle, le m.atin dont ilz avoient esté la derrenière nuyt ensemble. Et alors dist Troïlus à par soy : « Or voy je maintenant mon songe clèrement, mon souspeçon et mes pensemens vroiz. »

Puis se partit Troïlus moult dolant et corroucé