II

tu le vaulx. Tu en feras ton plaisir. Et, de ma part, je serois tresaise et joyeulx si je pouvois avoir de ta semence, quant ce ne seroit ja que pour dire : Voylà de la race du cheval qui parloit.

Statius. Par le corbieu! je vous en garderay bien, puisque vous vous estes meslé de parler si avant. Sus! sus! allons, et vous délibérez de trotter hardiment, et ne faictes point la beste, si vous estes sage, que je ne vous avance bien de ce baston.

Ardelio. Adieu, adieu, compagnon; te voylà bien peneux de ce que ton cheval a si bien parlé à toy.

Statius. Par la vertubieu ! je l'accoustreray bien, si je puis estre à l'estable, quelque parleur qu'il soit.

Ardelio. Or jamais je n'eusse creu qu'ung cheval eust parlé, si je ne l'eusse veu et ouy. Voylà ung cheval qui vault cent milions d'escuz. Cent milions d'escuz! on ne le sçauroit trop estimer. Je m'en voys conter le cas à maistre Cerdonius, lequel ne l'oblira pas en ses annalles.

Mercure. Voylà desja quelque chose de nouveau, pour le moins. Je suis bien ayse qu'il y avoit belle compaignie de gens, Dieu mercy! qui ont ouy et veu le cas. Le bruit en sera tantost par la ville, (juelcun le mettra par escript, et

par adventure qu'il y adjoustera du sien pour enrichir le compte. Je suis asseuré que j'en trouveray tantost la copie à vendre vers ces libraires. Ce pendant qu'il viendra quelques autres nouvelles, je m'en voys faire mes commissions, et spécialement chercher la trompette de la ville pour faire crier s'il y a personne qui ayt point trouvé ce diable de livre.