DE DEUX CHIENS

HYLACTOR ET PAMPHAGUS.

% l^j^l l^f YLACTOR. S'il plaisoit h Anubis que je M IpIiII^ \P\ peusse trouver ung chien lequel sceut ^^^Mf-^^Bl parler, entendre et tenir propos comme je fay, que je seroye ayse! car je ne me veulx pas avancer de parler que ce ne soit à mon semblable. Et, toutesfoys, je suis bien asseuré que, si je vouloye dire la moindre parolle devant les hommes, que je seroye le plus heureux chien qui fut jamais. Je ne sçay prince ne roy en ce monde qui fut digne de m'avoir, veu l'estime que l'on pourroit faire de moy. Se j'en avoye tant seulement dict autant que j'en vien de dire en quelque compagnie de gens, le bruyt en seroit desja jusques aux Indes, et diroit l'on par tout : « Il y a en ung tel lieu ung chien qui parle. » On viendroit

de tous les quartiers du monde là où je seroye, et bailleroit l'on de l'argent pour me veoir et ouyr parler. Et encores ceulx qui m'auroyent veu et ouy gaigneroyent souvent leur escot à racompter aux estrangers et aux pays loingtains de ma façon et de mes propos. Je ne pense pas que l'on ayt veu chose plus merveilleuse, plus exquise, ne plus délectable. Si me garderay je bien, toutesfoys, de rien dire devant les hommes que je n'aye trouvé premièrement quelque chien qui parle comme moy, car il n'est pas possible qu'il n'en y ayt encores quelcun au monde. Je sçay bien qu'il ne me sçauroit eschapper si petit mot que incontinent ilz ne courrussent tous à moy pour en ouyr davantage. Et peult estre que, à ceste cause, ilz me vouldroyent adorer en Grèce, ainsi que l'on a faict Anubis en Egypte, tant sont les humains curieux de nouveauté. Or encores n'ay je rien dict et ne diray entre les hommes que je n'aye trouvé quelque chien qui ayt parlé à moy. Toutesfois, que c'est une grand peine de se taire, mesmement à ceulx qui ont beaucoup de choses à dire, comme moy! Mais voicy que je fay : quant je me trouve seulet et que je voy que per-^ sonne ne me peut ouyr, je me prens à dire a par moy tout ce que j'ay sur le cueur, et vuyde ainsi mon flux de ventre, je vous dy de langue, sans

que le monde en soit abreuvé. Et, bien souvent, en allant par les rues a l'heure que tout le monde est couché, j'appelle pour mon passetemps quelcun de noz voisins par son nom, et luy fay mettre la teste à la fenestre et cryer une heure : « Qui est là? » Après qu'il a prou cryé, et que personne ne luy respond, il se colère, et moy de rire! Et quant les bons compagnons de chiens s'assemblent pour aller battre le pavé, je m'y trouve voulentiers, affin que je parle librement entre eulx, pour veoir si j'en trouveray point qui entende et parle comme moy, car ce me seroit une grande consolation, et la chose que plus je désire en ce monde. Or, quand nous jouons ensemble et nous mordons l'ung l'autre, je leur dy tousjours quelque chose en l'oreille , les appelant par leurs noms et surnoms, en leur demandant s'ilz parlent point, de laquelle chose ilz sont aussi estonnez que si cornes leur venoyent : car, voyans cela, ils ne sçavent que penser, si je suis homme desguisé en chien ou chien qui parle. Et, afin que je die tousjours quelque chose et que je ne demeure sans parler, je me prens à crier : « Au meurtre ! bonnes gens , au meurtre ! » Adonc tous les voisins s'esveillent et se mettent aux fenestres. Mais, quand ilz voyent que ce n'est que mocquerie, ilz s'en retournent coucher. Cela

faict, je passe en une aultre rue, et crye tant que je puis : « Aux larrons! aux larrons! Les boutiques sont ouvertes ! » Cependant qu'ilz se lievent je m'en voys plus avant, et, quant j'ay passé ung coing de rue , je commence à crier : « Au feu ! au feu ! le feu est en vostre maison ! » Incontinent vous les verriez tous saillir en place, les ungs en chemises, les aultres tous nudz, les femmes toutes deschevelées, cryans : « Où est ce? où est ce? » Et quant ilz ont pr^u esté en ceste sueur et qu'ilz ont bien cherché et regardé par tout, ilz trouvent à la fin que ce n'est rien, dont s'en retournent achever leurs besongnes et dormir seurement. Puis, quant j'ay bien faict toutes les follies de mes Nuictz attiques jusques au chapitre Qui sunt levés et importuni loquutores, pour mieulx passer le demourant de mes phantasies, nng peu devant que le jour vienne, je me transporte au parc de noz ouailles faire le loup en la paille; ou je m'en voys desraciner quelque arbre mal planté, ou brouiller et mesler les fîletz de ces pescheurs, ou mettre des os et des pierres au lieu du trésor que Pycargus l'usurier a caché en son champ; ou je voys pisser aux potz du potier et chier en ses beaulx vases; et si d'adventure je rencontre le guet, j'en mors trois ou quatre pour mon plaisir, et puis je m'en fuy tant que je

puis, cryant : « Qui me pourra prendre, si me prenne! » Mais, quoy qu'il en soit, si suis je bien marry que je ne trouve quelque compaignon lequel sache aussi parler. Toutesfoys si ay je bonne espérance d'en trouver, ou il n'en y aura point au monde. Voylà Gargilius avec tous ses chiens qui s'en va à la chasse. Je m'en voy esbattre avec eulx, affin de sçavoir s'il en y a point en la compaignie quelcun qui parle : « Dieu gard les compaignons! Dieu gard Espagnol mon amy! Dieu gard mon compagnon lévrier. » Ouy dea! ilz sont tous muetz ; au diable le mot que l'on sçauroit avoir d'eulx! N'est ce pas pitié? Puisque ainsi est que je n'en trouve pas ung qui me puisse respondre, je vouldrois sçavoir quelque poison ou herbe qui me feist perdre la parolle et me rendist aussi bien muet qu'ilz sont. Je seroye bien plus heureux que de languir ainsi du misérable désir que j'ay de parler, et ne trouver oreilles commodes pour ce faire, telles quej e les désire. Et toy, compaignon, ne sçaurois tu rien dire! Parlez à des bestes. Dy, hé, matin, parles tu point?

Pamphagus. Qui appelles tu matin? Matin toy mesmes !

Hylactor. Hé! mon compagnon, mon amy, pardonne moy, s'il te plait, et m'accolle, je te prie. Tu es celuy que j'ay le plus désiré et cher-

ché en ce monde, et voylà ung sault, pour l'amour de Diane, qui m'a rendu tant heureux en ceste chasse que je y ay trouvé ce que je cherchoye. En voylà encor ung autre pour toy, gentil Anubis; et cestuy là pour Cerberus , qui garde les enfers. Dy moy ton nom , s'il te plait?

Pamphagus. Pamphagus.

Hylactor. Est ce toy, Pamphagus, mon cousin, mon amy? Tu cognois donc bien Hylactor? Pamphagus. Voire dea, je cognois bien Hylactor : où est il?

Hylactor. C'est moy.

Pamphagus. Par ta foy? Pardonne moy, Hylactor, mon amy; je ne te pouvoye recognoistre, car tu as une oreille couppée, et je ne sçay quelle cicatrice au front que tu ne soulois pas avoir. Dont t'est venu cela?

Hylactor. Ne t'en enquiers plus avant, je te prie : la chose ne vauldroit pas le racompter; parlons d'autre matière. Où as tu esté, et qu'as tu faict depuis que nous perdismes nostre bon maistre Acteon ?

Pamphagus. Ha! le grand malheur! tumerenou-

velles mes douleurs. O! que je perdiz beaucoup

en sa mort, Hylactor, mon amy! car je faisoye

grand chère, lors, où maintenant je meurs de fain.

Hylactor. Par mon serment! nous avions bon

temps , quand je y pense. C'estoit ung homnne de bien que Acteon , et vray gentilhomme, car il aymoit bien les chiens. On n'eust osé frapper le moindre de nous, quoy qu'il eust faict; et avec cela que nous estions bien traictez : tout ce que nous pouvions prendre, feust en la cuisine, au garde manger ou ailleurs, estoit nostre, sans que personne eust esté si hardy de nous battre ou toucher, car il l'avoit ainsi ordonné pour nous nourrir plus libéralement.

Pamphagus. Helas! il est vray. Le maistreque je sers maintenant n'est pas tel , il s'en fault beaucoup : car il ne tient compte de nous, ny ses gens ne nous baillent rien à manger la plus part du temps; et, toutes les foys que l'on nous trouve en la cuysine, on nous hue, on nous hare, on nous menace, on nous chasse, on nous bat, tellement que nous sommes plus murdris et deschirez de coups que vieulx coquins.

Hylactor. Voylà que c'est, Pamphagus, mon amy, il fault prendre en pacience. Le meilleur remède que je sache pour les doleurs présentes, c'est d'oublier les joyes passées, en espérance de mieulx avoir* ainsi que, au contraire, le souvenir des maulx passez, sans crainte d'iceulx, ny de pis, faict trouver les biens presens bien meilleurs et beaucoup plus doulx. Or sçais tu que nous

ferons, Pamphagus, mon cousin? Laissons leur courre le lièvre, et nous escartons toy et moy pour deviser ung petit plus à loisir.

Pamphagus. J'en suis content; mais il ne nous fault gueres demeurer.

Hylactor. Tant peu que tu vouldras; peult estre que nous ne nous reverrons de long temps. Je seray bien ayse de te dire plusieurs choses et d'en entendre aussi de toy. Nous voicy bien; ilz ne nous sçauroient veoir en ce petit boscage, et puis leur gibbier ne s'adresse pas pardeçà. Ce pendant je te demanderoye voluntiers si tu sçays point la cause pourquoy toy et moy parlons, et tous les autres chiens sont muetz, car je n'en trouvay jamais qui me sceust rien dire fors que toy, et si en ay beaucoup veu en mon temps.

Pamphagus. N'en sçais tu rien? Je te la voys dire. Te souvient il bien quand noz compagnons Melancheres,ThendamasetOresitrophus saillirent sus Acteon, leur bon maistre et le nostre, lequel Diane avoit nouvellement transformé en serf, et que nous autres accourrusmes et luy baillasmes uant de coups de dentz qu'il mourut en la place? Tu dois sçavoir, comme j'ay depuis veu en je ne sçay quel livre qui est en nostre maison...

Hylactor. Comment! tu, sçais donc bien lire? Où as tu apprins cela?

Pamphagus. Je le te diray après, mais escoute cecy premièrement. Tu doys entendre que, quand ung chascun de nous faisoit ses effortz de le mordre, d'adventure je le mordiz en la langue, laquelle il tiroit hors la bouche, si bien que j'en emportay une bonne pièce que j'avallay. Or dict le compte que cela fut cause de me faire parler : il n'y a rien si vray, car aussi Diane le vouloit. Mais, pour ce que je n'ay point encores parlé devant les hommes, on cuyde que ce ne soit qu'une fable; toutesfoys, si est on tousjours après pour trouver les chiens qui mangèrent de la langue d'Acteon serf : car le livre dict qu'il y en eust deux, dont j'en suis l'ung.

Hylactor. Corbieu! je suis donc l'autre, car j'ay souvenance que je mangeay ung bon loppin de sa langue; mais je n'eusse jamais pensé que la paroUe me fust venue à cause de cela.

Pamphagus. Je t'asseure, Hylactor, mon amy, qu'il est ainsi que je le te dy, car je l'ay veu en escript.

Hylactor Tu es bien heureux de te cognoistre ainsi aux livres, où l'on voit tant de bonnes choses. Que c'est un beau passetemps! Je vouidroye que Diane m'eust faict la grâce d'en sçavoir autant que toy.

Pamphagus. Et je vouidroye bien que je n'en

sceusse ja tant, car deqiioy sert cela à ung chien, ny le parler avec? Ung chien ne doibt autre chose sçavoir sinon abayer aux estrangers, servir de garde à la maison , flatter les domestiques, aller à la chasse, courir le lièvre et le prendre, ronger les os, lescher la vaisselle et suivre son maistre.

Hylactor. Il est vray; mais toutesfoys si faict il bon sçavoir quelque chose davantage : car on ne sçait où l'on se trouve. Comment? tu n'as donc point encore donné à entendre aux gens que tu sçais parler?

Pamphagus. Non.

Hylactor. Et pourquoy?

Pamphagus. Pour ce qu'il ne m'en chault, car j'ayme mieulx me taire.

Hylactor. Toutesfoys, si tu voulois dire quelque chose devant les hommes , tu sçais bien que les gens de la ville non seulement te iroyent escouter, s'esmerveillans et prenans plaisir h te ouyr ; mais aussi ceulx de tout le pays à l'environ, voire de tous costez du monde , viendroyent à toy, pour te veoir et ouyr parler. N'estimes tu rien veoir à l'entour de toy dix milions d'oreilles qui t'escoutent, et autant d'yeulx qui te regardent en face?

Pamphagus. Je sçay bien tout cela. Mais quel prouflfit m'en viendroit dadvantage? Je n'ayme

point la gloire de causer, affin que je le te dye : car, avec ce que ce me seroit une peine, il n'y auroit si petit coquin à qui il ne me faillist tenir propos et rendre raison. On me tiendroit en chambre, je le sçay bien; on me froteroit, on me pigneroit, on m'accoustreroit, on m'adoreroit, on me doreroit, on me dorelotteroit; bref, je suis bien asseuré que l'on me vouldroit faire vivre autrement que le naturel d'ung chien ne requiert. Mais

Hylactor. Et bien? serois tu pas content de vivre ung petit à la façon des hommes?

Pamphagus. a la façon des hommes! Je te jure par les trois testes de Cerberus que j'ayme mieulx estre tousjours ce que je suys que plus avant ressembler les hommes en leur misérable façon de vivre, quand ne seroit ja que pour le trop parler dont il me fauldroit user avec eulx.

Hylactor. Je ne suis pas de ton opinion. Vray est que je n'ay point encores parlé devant eulx. Mais, sans cela que j'avoye en phantasie de trouver premièrement quelque compagnon qui sceut parler comme nous, je n'eusse pas tant mis à leur dire quelque chose : car j'en vivroye mieux, plushonnorablement et magnifiquement. Ma parolle seroit préférée à celle de tous les hommes, quoy que je disse : car, incontinent que j'ouvri-

roye la bouche pour parler. Ton fcroit faire silence pour m'escouter. Ne sçay je pas bien que c'est que des hommes? Hz se faschent voulentiers des choses présentes, accoustumées, familières et certaines, et ayment tousjours mieulx les absentes, nouvelles, estrangeres et impossibles. Et sont si sottement curieux qu'il ne fauldroit qu'une petite plume qui s'eslevast de terre le moins du monde pour les amuser tous quantz qu'ilz sont. Pamphagus. Il n'y a rien si vray, que les hommes se faschent d'ouyr parler l'ung l'autre et vouldroyent bien ouyr quelque chose d'ailleurs que d'eulx mesmes. Mais considérez aussi qu'à la longue il leur ennuiroit de te ouyr causer. Ung présent n'est jamais si beau ne si plaisant qu'à l'heure qu'on le présente et que avec belles parolles on le faict trouver bon; on n'a jamais tant de plaisir avec Lycisca que la première foys que l'on la couvre; ung collier n'est jamais si neuf que le premier jour qu'on le mect : car le temps envieillit toutes choses, et leur faict perdre la grâce de nouveauté. Auroit l'on prou ouy parler les chiens, on vouldroit ouyr parler les chatz, les beufs, les chèvres, les ouailles, les asnes, lesporceaulx, les pulces,,les oyseaulx, les poissons, et tous aultres animaulx. Et puis qu'auroit l'on davantage quand tout seroit dict? Si tu considères

bien , il vault mieuix que tu soys encores à parler que si tu eusse desja tout dict.

Hylactor. Or je ne m'en pourrois pas tenir longuement.

Pamphagus. Je m'en raporte à toy. On te aura en fort grand admiration pour ung temps; on te prisera beaucoup; tu mengeras de bons morceaulx, tu seras bien servy de tout, excepté que l'on ne te dira pas : « Duquel voulez vous? » car tu ne boys point de vin, comme je croy. Au reste, tu auras tout ce que tu demanderas, mais tu ne seras pas en telle liberté que tu desireroys: car bien souvent il te fauldra parler à l'heure que tu vouldrois dormir et prendre ton repos; et puis, je ne sçay si à la fin on se faschera point de toy. Or il est temps de nous retirer pardevers noz gens : allons nous en à eulx; mais il fault faire semblant d'avoir bien couru et travaillé et d'estre hors d'aleine.

Hylactor. Qu'est ce que je voy là au chemin?

Pamphagus. C'est ung paquet de lettres qui est tumbé à quelcun.

Hylactor. Je te prie, desplie le et regarde veoir que c'est, puisque tu sçais bien lire.

Pamphagus. « Aux Antipodes supérieurs. »

Hylactor. Aux Antipodes supérieurs! Je croy qu'il y aura quelque chose de nouveau.

Pamphagus. « Les Antipodes inférieurs aux Antipodes supérieurs. »

Hylactor. Mon Dieu, qu'elles viennent de bien loing !

Pamphagus, « Messieurs les Antipodes, par le désir que nous avons de humainement converser avec vous, à celle fin d'apprendre de voz bonnes façons de vivre et vous communiquer des nostres, suyvans le conseil des astres, avions faict passer par le centre de la terre aulcuns de noz gens pour aller par devers vous; mais vous, ayans aperceu cela , leur avez estouppé le trou de vostre costé , de sorte qu'il fault qu'ilz demeurent aux entrailles de la terre. Or nous vous prions que vostre bon plaisir soit leur donner passage; autrement nous vous en ferons sortir pardelà de tant de costez, et en si grande abundance, que vous ne sçaurez au quel courir. Tellement que ce que l'on vous prie faire de grâce et amour, serez contrains souffrir par force, à vostre grande honte et confusion. Et à Dieu soyez. Voz bons amys, les Antipodes inférieurs. » Voylà bien des nouvelles.

Hylactor. C'est mon, et merveilleuses.

Pamphagus. Escoute : on me husche; il m'en fault aller. Nous lirons le demeurant des lettres une aultre foys.

Hylactor. Mais où est ce que tu les mettras. ''

Cache les là en quelque trou de cette pyramide, et les couvre d'une pierre : on ne les trouvera jamais; et puis aujourd'huy à quelque heure, si nous sommes de loysir, ou demain, qui est le jour des Saturnalles, nous les viendrons achever de lire, car j'espère qu'il y aura quelques bonnes nouvelles. Aussi bien te veulx je apprendre plusieurs belles fables que j'ay ouy racompter autrefois, comme la fable de Prometheus, la fable du grand Hercules de Libye, la fable du Jugement de Paris, la fable de Saphon, la fable de Erus qui revesquit, et la chanson de Ricochet, si d'adventure tu ne la sçaiz.

Pamphagus. Tu m'en bailles bien ! Je suis tout bersé de telles matières. Hastons nous, je te prie, et nous taisons, que noz gens, qui sont icy prés, ne nous oyent parler.

Hylactor. Je ne parleray donc meshuy? Si feray, par Diane, si je puis estre en nostre maison, car je ne m'en pourroie plus tenir. A Dieu donc.

Pamphagus. Et n'oublie pas de bien ouvrir la bouche et tirer la langue, affin de faire les mines d'avoir bien couru.

Pamphagus. Ce follastre Hylactor ne se pourra tenir de parler, affin que le monde parle aussi de luy. Il ne sçauroit dire si peu de parolles qu'il

CYMBALLIM M U N D 1 . 2 75

n'assemblist tantost beaucoup de gens, et que le bruit n'en coure incontinent par toute la ville : tant sont les hommes curieux et devisans voluntiers des choses nouvelles et estrangeres!

Fin du présent livre intitulé Cymbalum Mundi,

en françoys, imprime nouvellement à Paris

pour Jehan Morin, libraire, demourant

audict lieu, en la rue Sainci Jacques,

à l'enseigne du Croyssant,