LIVRE ill, CHAPITRE XXX

fort de ceste discipline, vous de vostre coslé l'entretiendrez en amitié conjugale, continuerez en preud'homie, luy montrerez bon exemple, vivrez pudiquement, chastement, vertueusement en vostre mesnage, comme voulez qu'elle de son costé vive. Car comme le miroir est dit bon et perfaict, non celuy qui plus est orné de dorures et pierreries, mais celuy qui véritablement représente les formes objectes, aussi celle femme n'est la plus à estimer, laquelle seroit riche, belle, élégante, extraicte de noble race ; mais celle qui plus s'efforce avec Dieu soy former en bonne grâce, et conformer aux meurs de son mary. Voyez comment la lune ne prend lumière ne de Mercure, ne de Jupiter, ne de Mars, ne d'autre planète ou estoille qui soit on ciel. Elle n'en reçoit que du Soleil son mary, et de luy n'en reçoit point plus qu'il luy en donne par son infusion et aspectz. Ainsi serez vous à vostre femme en patron et exemplaire de vertus et honnesteté. Et continuement implorerez la grâce de Dieu à Yostre protection.

Vous voulez donc, dist Panurge, filant les moustaches de sa barbe, que j'espouse la femme forte, descrite par Salomon? Elle est morte, sans point de faulte. Je ne la vis onques, que je saiche : Dieu me le veuille pardonner. Grand mercy toutesfois, mon père. Mangez ce taillon de massepain. Il vous aidera à faire digestion : puis boirez une couppe de hippocras clairet : il est salubre et stomachal. Suivons.

B62 • PANTAGRUEL