LIVRE IV, CHAPITRE LXIII
naturelle sympathie excita tous ses compaignons à pareillement baisler, demanda Remède contre les oscitations et baislements. Xenomanes, comme tout lanterne à l'accoustrement de sa lanterne, demanda Manière de équilibrer et balancer la cornemuse de l'estomac, de mode qu'elle ne panche poinct plus d'un cousté que d'aultre. Carpalim, jouant de son moulinet, demanda Quants mouvemens sont precedens en Nature, avant que la personne soit dicte avoir faim. Eusthenes, oyant le bruit, accourut sus le tillac, et des le capestan, s'escria, demandant Pourquoy en plus grand dangier de mort est l'home mords à jeun d'un Serpent jeun, qu'après avoir repeu, tant l'home que le serpent? pourquoy est la salive de l'home jeun vénéneuse à tous Serpens et Animaux vénéneux ?
« Amis, respondit Pantagruel, à tous les doubtes et questions par vous proposées compete une seule solution, et à tous telz symptomates et accidens une seule mcdicine. La response vous sera promptement expousée, non par longs ambages et discours de parolles : l'estomach affamé n'a point d'aureilles, il n'oyt goutte. Par signes, gestes et effectz serez satisfaicts, et aurez resolution à vostre contentement. Comme jadis en RomeTarquin l'orgueilleux, Roy dernier des Romains (ce disant, Pantagruel toucha la chordedela campanelle, frère Jean soubdain courut à la cuisine), par signe respondit à son filz Sex. Tarquin estant en la ville des Gabins, lequel luy avoit envoyé home exprès pour entendre comment il pourroit les Gabins du tout subjuguer et à perfaicte obéissance réduire, le Roy susdict, soy défiant de la fidélité du messaigier, ne luy respondit rien. Seulement le mena en son jardin secret : et en sa veue et présence avecques son bracquemart couppa les haultes testes des Pavotz là estans. Le messaigier retournant sans response, et au filz racontant ce qu'il avoit veu faire à son père, feut facile par telz signes entendre qu'il luy conseilloit trancher les testes aux principaulx de la
ville, pour rnieulx en office et obéissance totale contenir le demourant du menu populaire. »
