CHAPITRE XXXIV
COMMENT NOUS ARRIVASMES A L'oRACLE DE LA BOUTEILLE
Nostre noble Lanterne nous esclairant, et conduisant en toute joyeuseté, arrivasmes en l'isle désirée, en laquelle estoit l'oracle de la Bouteille. Descendant Panurge en terre fîst sur un pied la gambade en l'air gaillardement, et dist à Pantagruel : « Aujourd'huy avons nous ce que cherchons avecques fatigues et labeurs tant divers. » Puis se recommanda courtoisement à nostre Lanterne. Icelle nous commanda tous bien espérer, et, quelque chose qui nous apparust, n'estre aucunement effrayez.
Approchans au temple de la dive Bouteille, nous convenoit passer parmy un grand vinoble faict de toutes espèces de vignes, comme Phalerne, Malvoisie, Muscadet, Taige, Beaune, Mirevaux, Orléans, Picardent, Arbois, Coussi, Anjou, Grave, Corsicque, Vierron, Nerac et autres. Le dit vinoble fut jadis par le bon Bacchus planté avec telle bénédiction que tous
314 LIVRE V, CHAl'lTRK XXXI V
temps il portoit feuille, fleur et fruict, comme les orangiers de Suraine. Nostre Lanterne magnifique nous commanda manger trois raisins par homme, mettre du pampre en nos souliers, et prendre une branche verde en main gauche. Au bout du vignoble passasmes dessous un arc antique, auquel estoit le trophée d'un beuveur bien mignonnement insculpé, sçavoir est en un lieu, long ordre de flaccons, bourraches, bouteilles, fioles, f arriéres, barils, barraux, pots, pintes, semaises antiques, pendentes d'une treille ombrageuse; en autre, grande quantité d'ails, oignons, eschalottes, jambons, boutargues, parodelles, langues de bœuf fumées, formages vieux, et semblable confiture entrelassee de pampre, et ensemble par grande industrie fagottee avecques des seps : en autre, cent formes de verres comme verres à pied et verres à cheval, cuveaux, retombes, hanaps, jadaux, salvernes, tasses, gobelets, et telle semblable artillerie Bacchique. En la face de l'arc dessous le zoophore estoient ces deux vers inscrips .
Passant icy ceste poterne Garny toy de bonne lanterne.
« A cela, dist Pantagruel, avons nous pourveu. Car en toute la région de Lanternois, n'y a Lanterne meilleure et plus divine que la nostre. «
Cestuy arc finissoit en une belle et ample tonnelle, toute faicte de ceps de vignes, aornez de raisins de cinq cens couleurs diverses, et cinq cens diverses formes non naturelles, mais ainsi composées par art d'agriculture, jaunes, bleux, tanez, azurez, blancs, noirs, verds, violets, riolez, piolez, longs, ronds, torangles, couillonnez, couronnez, barbus, cabus, herbus. La fin d'icelle estoit close de trois antiques lierres, bien verdoyans et tous chargez de bacques. Là nous commande nostre illustrissime Lanterne, de ce lierre chascun de nous se faire un chappeau albanois, et s'en couvrir toute la teste. Ce que fut faict sans demeure. « Dessous, dist lors Pantagruel,
ceste treille d'eust ainsi jadis passé la Pontife de Jupiter. — La raison, dist nostre preclare Lanterne, estoit mystique. Car y passant auroit le vin, ce sont les raisins, au dessus de la teste, et sembleroit estre comme maistrisée et dominée du vin, pour signifier que les Pontifes, et tous personnages, qui s'addonnent et dédient à contemplation des choses divines, doivent en tranquillité leurs esprits maintenir, hors toute perturbation de sens : laquelle plus est manifestée en yvrognerie qu'en autre passion, quelle que soit.
« Vous pareillement au temple ne seriez receus de la dive Bouteille, estans par cy dessous passez, sinon que Bacbuc la noble Pontife vist de pampre vos souliers plains : qui est acte du tout, et, par entier diamètre contraire au premier, et signification évidente, que le vin vous est en mespris, et par vous conculqué et subjugué. — Je, dist frère Jean, ne suis point clerc, dont me desplaist; mais je trouve dedans mon bréviaire qu'en la Révélation fut, comme chose admirable, veue une femme ayant la lune sous les pieds : c' estoit, comme m'a exposé Bigot, pour signifier qu'elle n' estoit de la race et nature des autres, qui toutes ont à rebours la lune en teste, et par conséquent le cerveau tou.çjours lunatique : cela m'induit facilement à croire ce que dictes, madame Lanterne m' amie. »
