LIVRE V, CHAPITRE XLIII

composa la volupté de soy dedans baigner au mal qu'il prevoyoit luy advenir de ce transitoire plaisir. « Ha ! dist Bacbuc, voylà que c'est non considérer en soy, ne entendre les mouvemens que faict la langue musculeuse, lorsque le boire dessus coule pour descendre, non es poulmops, par l'artère inequale, comme a esté l'opinion du bon Platon, Plutarque, Macrobe, et autres, mais en l'estomac par l'œsophage. Gens peregrins, avez vous les gosiers enduits, pavez et esmaillez, comme eut jadis Pithyllus, dit Theutes, que de ceste liqueur deifique onques n'avez le goust ne saveur recongneu ? Apportez icy, dist elle à ses damoiselles, mes descrottoires que sçavez, afin de leur racler, esmonder et nettoyer le palat. »

Furent donques apportez beaux, gros et joyeux jambons, belles grosses et joyeuses langues de bœuf fumées, saumades belles et bonnes, cervelats, boutargues, caviar, bonnes et belles saucisses de venaison, et tels autres ramonneurs de gosier. Par son commandement nous en mangeasmes j usques là que confessions nos estomachs estre tresbien escurez et soif nous importuner assez fascheusement ; dont nous dist : « Jadis un Capitaine juif, docte et chevalereux, conduisant son peuple par les desers en extrême famine, impetra des cieux la manne, laquelle leur estoit de goust tel, par imagination, que par avant réalement leur estoient les viandes ; ici de mesmes, beuvans de ceste liqueur mirifique, sentirez goust de tel vin comme l'aurez imaginé. Or, imaginez et beuvez. » Ce que nous fismes. Puis s'escria Panurge, disant : « Par Dieu, c'est icy vin de Beaune, meilleur qu' onques jamais je beus, ou je me donne à nonante et seize diables. O pour plus longuement le gouster, qui auroit le col long de trois coudées, comme desiroit Philoxenus, ou comme une grue, ainsi que souhaitoit Melanthius ! — Foy de lanternier, s'escria frère Jean, c'est vin de Grave, gallant et voltigeant. O pour Dieu, amye, enseignez moy la manière comment tel le faictes. — A moy, dist Pantagruel, il me semble que sont vins de Mireveaux, car

avant boire je l'imaginois. Il n'a que ce mal qu'il est frais, mais je dis frais plus que glace, que l'eau de Nonacris et Derce, plus que la fontaine de Canthoporie en Corinthe, laquelle glassoit l'estomach et parties nutritives de ceux qui en beuvoient. — Beuvez, dist Bacbuc, une, deux ou trois fois. De rechef, changeans d'imagination, telle trouverez au goust, saveur ou liqueur, comme l'aurez imaginé. Et doresnavant, dictes qu'à Dieu rien soit impossible. — Onques, respondis je, je ne fut dit de nous; nous maintenons qu'il est tout puissant. »