LIVRE V, CHAPITRE XLVI

Ceste chanson parachevée, Bacbuc jetta je ne sçay quoy dedans la fontaine, et soudain commença l'eau bouillir à force, comme fait la grande marmite de Bourgucil quand y est feste à bastons. Panurge escoutoit d'une aureillc en silence; Bacbuc se tenoit prés de luy agenouillée, quand de la sacrée Bouteille issit un bruit tel que font les abeilles naissantes de la chair d'un jeune taureau occis et accoustré selon l'art et invention d'Aristeus, ou tel que fait un guarot desbandant l'arbaleste, ou en esté une forte pluye soudainement tombant. Lors fut ouy ce mot : Trinc. « Elle est, s'escria Panurge, par la vertu Dieu, rompue, ou feslée, que je ne mente : ainsi parlent les bouteilles crystalines de nos pays, quand elles près dufeu esclattent. »

Lors Bacbuc se leva et print Panurge souz le bras doucettement, luy disant : « Amy, rendez grâces es cieux, la raison vous y oblige : vous avez eu promptement le mot de la dive Bouteille. Je dy le mot plus joyeux, plus divin, plus certain, qu'encores d'elle aye entendu depuis le temps qu'icy je ministre à son tressacré Oracle. Levez-vous, allons au chapitre, en la glose duquel est le beau mot interprété. — Allons, dist Panurge, de par Dieu. Je suis aussi sage que entan. Esclairez : où est ce livre? Tournez : où est ce chapitre? Voyons ceste joyeuse glose. »