ARCHITRICLIN DUDICT PANTAGRUEL

Du nombre d'Or no» dicitur ;

Je n'en trouve point ceste année, quelque calculation que j'en aye faict.

Passons oultre. Verte folium

AU LISEUR BENEVOLE Salut et paix en Jésus le Christ.

Considérant infiniz abus estre perpétrez à cause d'un tas de Prognostications de Lovain, faictes à l'ombre d'un verre de vin, je vous en ay présentement calculé une la plus seure et véritable que feut oncques veuë, comme l'expérience vous le demonstrera. Car sans double, veu que dict le Prophète Royal, Psalme V, à Dieu : « Tu destruyras tous ceulx qui dise mensonges, » ce n'est legier péché de mentir à son escient, et abuser le pouvre monde curieux de sçavoir choses nouvelles. Comme de tout temps ont esté singulièrement les François, ainsi que escript César en ses Commentaires, et Jean de Gravot on Mythologies Galliques, Ce que nous voyons encores de jour en jour par France, ou le premier propos qu'on tient à gens fraischement arrivez sont : o Quelles nouvelles? Sçavez-vous rien de nouveau? Qui dict? Qui bruict par le monde?» Et tant y sont attentifz que souvent se couroussent contre ceulx qui viennent de pays estranges sans apporter pleines bougettes de nouvelles, les appelant veaulx et idiotz.

Si doncques, comme ilz sont promptz à demander nouvelles, autant ou plus sont ilz faciles à croire ce que leur est annoncé, debvroit-on pas

352 PANTAGRUELINE PROGNOSTICATlON

mettre gens dignes de foy à gaiges à l'entrée du Royaulme, qui ne se serviroyent d'aultre chose sinon d'examiner les nouvelles qu'on y apporte, et à sçavoir si elles sont véritables? Ouy certes. Et ainsi ha faict mon bon maistre Pantagruel par tout le pays de Utopie et Dipsodie. Aussi luy en est il si bien advenu, et tant prospère son territoire, qu'ils ne peuvent de présent avanger à boyre, et leur con\-icndra cspandre le vin en terre si d'ailleurs ne leur vient renfort de beuveurs et bons raillars.

Voulant doncques satisfaire à la curiosité de tous bons compaignons, j'ai revolvé toutes les Pantarches des cieulx, calculé les quadratz de la lune, crocheté tout ce que jamais pensèrent tous les Astrophiles, Hypernephelistes, Aneniophylaces, Uranopetes et Ombrophores, et conféré du tout avecques Empedocles, lequel se recommande à vostre bonne grâce. Et tout le Tu auicm ay icy en peu de chapitres rédigé, vous asseurant que je n'en dy sinon ce que j'en pense, et n'en pense sinon ce que en est, et n'en est aultre chose, pour toute vérité, que ce qu'en lirez à ceste heure. Ce que sera dict au parsus sera passé au gros tamys à tors et à travers, et par adventure adviendra, par adventure n'adviendra mie.

D'un cas vous advertys que si ne croyez le tout, vous me faictes un maulvais tour, pour lequel icy ou ailleurs serez tresgriefvement puniz. Les petites anguillades à la saulce des ners bovins ne seront espargnées suz vos espaules. Et humez de l'air comme des huytres tant que vouldrez, car hardiment il y aura de bien chauffez si le fomier ne s'endort. Or mouschez vos nez, petitz enfans, et vous aultres, vieulx resveurs, affustez vos bezicles, et pesez ces motz au pois du Sanctuaire.