DES ECCLIPSES DE GESTE ANNÉE

Ceste année seront tant d'ecclipses du Soleil et de la Lune que j'ay peur (et non à tort) que noz bourses en pâtiront inanition, et noz sens perturbation. Saturne sera rétrograde, Venus directe. Mercure inconstant. Et un tas d'aultres Planètes ne iront pas à vostre comraendement.

Dont pour ceste année les chancres iront de cousté, et les cordiers à reculons, les escabelles monteront sur les bancs, les broches sus les landiers, et les bonnetz sus les chapeaulx ; les couilles pendront à plusieurs par faulte de gibessieres; les pusses seront noires pour la plus grande part; le lard fuyra les pois en Quaresme; le ventre ira devant; le cul se assoira le premier; l'on ne pourra trouver la febve au gasteau des Roys; l'on ne rencontrera poinct d'as au flux; le dez ne dira poinct à soubhait quoy qu'on le flate, et ne viendra souvant la chance qu'on demande; les bestes parleront en divers lieux. Quaresmeprenant gaignera son procez : l'une partie du monde se desguisera pour tromper l'aultre, et courront parmy les rues comme folz et hors du sens ; l'on ne veit oncques tel desordre en Nature. Et se feront ceste année plus de xxvii verbes anomaulx, si Priscian ne les tient de court. Si Dieu ne nous ayde, nous aurons prou d'affaires; mais au contrepoinct, s'il est pour nous, rien ne nous pourra nuyre, comme dict le céleste astrologue qui feut ravi jusques au Ciel. Rom. vu. cap. Si Deus pro nobis, quis contra iws? Ma foy, nemo Domine; car il est trop bon et trop puissant. Icy bénissez son sainct nom, pour la pareille.