LIVRE III, CHAPITRE XIV

accoustré que le sang luy sortoit par la bouche, par le nez, par les aureilles, par les œilz. Au demourant, courbatu, espaultré et froissé, teste, nucque, dours, poictrine, braz et tout. Croyez qu'en Avignon au temps du Carneval, les bacheliers, oncques ne jouèrent à la Raphe plus mélodieusement que feut joué sus Chiquanous. En fin il tombe par terre. On lui jecta force vin sus la face, on luy attacha à la manche de son pourpoinct belle livrée de jaulne et verd, et le mist on sus son cheval morveulx. Entrant en l'isle Bouchard ne sçay s'il fut bien pensé et traicté, tant de sa femme comme des Myres du pays. Depuis n'en feut parlé.

« Au lendemain, cas pareil advint, pour ce qu'on sac et gibbessiere du maigre Chiquanous n'avoit esté trouvé son exploict. De par le gras Prieur feut nouveau Chiquanous envoyé citer le Seigneur de Basché, avec deux Records pour sa sceureté. Le Portier, sonnant la campanelle, resjouyt toute la famille, entendans que Chiquanous estoit là. Basché estoit à table, dipnant avec sa femme et gentilzhommes. Il mande quérir Chiquanous, le feist asseoir prés de soy, les Records près les damoiselles, et dipnerent très bien et joyeusement. Sus le dessert, Chiquanous se levé de table, presens et oyans les Records, cite Basché : Basché gracieusement lui demande copie de sa commission. Elle estoit ja preste. Il prend acte de son exploict : à Chiquanous et à ses Records feurent quatre escuz Soleil donnez : chascun s'estoit retiré pour la farce. Trudon commence sonner du tabourin. Basché prie Chiquanous assister aux fiansailles d'un sien officier, et en recepvoir le contract, bien le payant et contentent. Chiquanous feut courtoys. Desgaina son escriptoire, eut papier promptement, ses Records près de luy. Loyre entre en salle par une porte, sa femme avecques les damoiselles par aultre, en accoustré* mens nuptiaulx. Oudart, revestu sacerdotalement, les prend par les mains, les interroge de leurs vouloirs, leurs donne sa bénédiction, sans espargne d'eaue beniste. Le contract est

passé et minuté. D'un cousté sont apportez vins et espices; de l'aultrc, livrée à tas, blanc et tanné; de l'aultre sont produictz guanteletz secrètement. »