LIVRE IV^ CHAPITRE XIX

donne dixhuict cens mille escuz de intrade à qui me mettra en terre tout foireux et tout breneux comme je suis, si oncques home feut en ma patrie de bien. Confiteor. Zalas ! un petit mot de testament, ou codicille pour le moins.

— Mille diables, dist frère Jan, saultent on corps de ce coqu. Vertus Dieu, parles tu de testament à ceste heure que sommes en dangier, et qu'il nous convient évertuer ou jamais plus? Viendras tu, ho Diable? Comité, mon mignon, o le gentil algousan ! deçà ! Gymnaste, icy sus l'estanterol. Nous sommes par la vertus Dieu troussez à ce coup. Voilà nostre Phanal extainct. Cecy s'en va à tous les millions de Diables. — Zalas, zalas, dist Panurge, zalas ! Bou, bou, bou, bou, bous. Zalas, zalas ! Estoit ce icy que de périr nous estoit prédestiné? Holos, bonnes gens, je naye, je meurs. Consummatum est. C'est faict de moy.

— Magna, gna, gna, dist frère Jan. Fy quil est laid, le pleurart de merde. Mousse, ho, de par tous les Diables, guarde l'escantoula. T'es tu blessé? Vertus Dieu, attache à l'un des bitous. Icy, de là, de par le Diable, hay ! Ainsi, mon enfant.

— Ha frère Jan, dist Panurge, mon père spirituel, mon amy, ne jurons poinct. Vous péchez. Zalas, zalas ! Be, be, be, bous, bous, bous, je naye, je meurs, mes amys. Je pardonne à tout le monde. Adieu, in manns. Bous, bous, bouououous. Sainct Michel d'Aure, sainct Nicolas, à ceste foys et jamais plus ! Je vous foys icy bon veu et à Nostre Seigneur que, si à ce coup m'estez aydans, j'entends que me mettez en terre hors ce dangier icy. je vous edifieray une belle grande petite chapelle ou deux entre Quande et Monssoreau, et n'y paistra vache ne veau. Zalas, zalas ! Il m'en est entré en la bouche plus de dixhuict seiUeaux ou deux. Bous, bous, bous, bous. Qu'elle est amere et sallee !

— Par la vertus, dist frère Jan, du sang, de la chair, du ventre, de la teste, si encores je te oy pioller, coqu au diable, je te gualleray en loup marin : vertus Dieu, que ne le jectons

nous au fond de la mer? Hespaillicr, ho gentil compaignon, ainsi mon amy. Tenez bien lassus. Vrayement voicy bien esclairé, et bien tonné. Je croy que tous les diables sont deschainez au jourdhuy ou que Proserpine est en travail d'enfant. Tous les Diables dansent aux sonnettes. »