CHAPITRE XXIV

COMMENT, PAR FRERE JAN, PANURGE EST DECLAIRÉ AVOIR EU PEUR SAKS CAUSE DURANT L'oRAIGE

« Bon jour, messieurs, dist Panurge, bon jour trestous. Vous vous portez bien trestous. Dieu mercy, et vous? Vous soyez les bien et à propous venuz. Descendons. Hespailliers, hau, jectez le pontal : approche cestuy esquif. Vous ayderay je encores là? Je suis allouvy et affamé de bien faire et tra-

vailler, comme quatre bœufz. Vrayement voycy un beau lieu, et bonnes gens. Enfans, avez vous encores affaires de mon ayde? N'espargnez la sueur de mon corps, pour l'amour de Dieu. Adam, c'est l'home, nasquit pour labourer et travailler, comme l'oyseau pour voler. Nostre Seigneur veult, entendez vous bien? que nous mangeons nostre pain en la sueur de nos corps, non pas rien ne faisans, comme ce penaillon de moine que voyez, frexa Jan, qui boyt, et meurt de paour. Voycy beau temps. A ceste heure congnois je la response de Anacharsis le noble philosophe estre véritable et bien en raison fondée, quand il, interrogé quelle navire luy sembloit la plus sceure, respondit : Celle qui seroit on port.

— Encores mieulx, dist Pantagruel, quand il, interrogé des quelz plus grand estoit le nombre, des mors ou des vivans, demanda : Entre les quelz comptez vous ceux qui naviguent sus mer ? Subtilement signifiant que ceulx qui sus mer navigent, tant près sont du continuel dangier de mort qu'ilz vivent mourans, et mourent vivons. Ainsi Portius Cato disoit de troys choses seulement soy repentir. Sçavoir est s'il avoit jamais son secret à femme révélé; si en oisyveté jamais avoir un jour passé, et si par mer il avoit peregriné en lieu aultrement accessible par terre.

— Par le digne froc que je porte, dist frère Jan à Panurge, couillon mon amy, durant la tempeste tu as eu paour sans cause et sans raison. Car tes destinées fatales ne sont à périr en eau. Tu seras hault en l'air certainement pendu, ou bruslé guaillard comme un père. Seigneur, voulez vous un bon guaban contre la pluie ? Laissez moy ces manteaulx de Loup et de Bedouault. Faites escorcher Panurge, et de sa peau couvrez vous. N'approchez pas du feu, et ne passez par davant les forges des mareschaulx, de par Dieu : en un moment, vous la voyriez en cendres; mais à la pluie exposez vous tant que vouldrez, à la neige et à la gresle. Voire, par Dieu, jectez vous au plonge dedans le profond de l'eau, ja ne serez pourtant