I20 LIVRE IV, CHAPITRE XXXVI

est ce la guarde ordinaire de la Royne du lieu, laquelle advertie par les jeunes Andouilles du guet que veistes sus l'arbre, comment en ce port surgeoit le beau et pompeux convoy de vos vaisseaulx, a pensé que là doibvoit estre quelque riche et puissant Prince, et vient vous visiter en persone. » De ce non satisfaict, Pantagruel assembla son conseil pour sommairement leur advis entendre sus ce que faire debvoient en cestuy estrif d'espoir incertain et craincte évidente.

Adoncques briefvement leurs remonstra comment telles manières de recueil en armes avoit souvent porté mortel préjudice, soubs couleur de caresse et amitié. « Ainsi, disoit-il, l'empereur Antonin Caracale, à l'ime foys occist les Alexan-drins; à l'aultre, desfit la compaignie de Artaban, roy des Perses, soubs couleur et fiction de vouloir sa fille espouser. Ce que ne resta impuny : car peu après il y perdit la vie. Ainsi les enfans de Jacob, pour venger le rapt de leur sœur Dyna, sacmenterent les Sichymiens. En ceste hypocritique façon, par Galien, empereur Romain, f eurent les gens de guerre defaicts dedans Constantinople. Ainsi, soubs espèce d'amitié, Antonius attira Artavasdes, loi de Arménie, puis le feist lier et enferrer de grosses chaisnes : finablement, le feist occire. Mille autres pareilles histoires trouvons nous par les antiques monumens. Et à bon droict est, jusques à présent, de prudence grandement loué Charles, roy de France sixième de ce nom, lequel retournant victorieux des Flamens et Gantois en sa bonne ville de Paris et, au Bourget en France, entendent que les Parisiens avecques leurs mailletz (dont furent surnommés Maillotins) estoient hors la ville issuz en bataille jusques au nombre de vingt mille combattans, n'y voulut entrer (quoy qu'ilz remontrassent que ainsi s'estoient mis en armes pour plus honorablement le recuillir sans aultre fiction ne mauvaise affection) que premièrement ne se feussent en leurs maisons retirez et desarmez. »