SUR LES NOMS PROPRES DES LIEUX ET DES PERSONES

La resolution du conseil feut qu'en tout événement ilz se tiendroient sus leurs guardes. Lors par CarpaUm et Gymnaste, au mandement de Pantagruel, feurent appeliez les gens de guerre qui estoient dedans les naufz Brindiere (des quelz coronel estoit Riflandouille) et Portoueriere (des quelz coronel estoit Tailleboudin le jeune). « Je soulaigeray, dist Panurge, Gymnaste de ceste peine. Aussi bien vous est icy sa présence nécessaire. — Par le froc que je porte, dist frère Jan, tu te veulx absenter du combat, Couillu, et j a ne retourneras, sus mon honneur. Ce n'est mie grande perte. Aussi bien ne feroit il que pleurer, lamenter, crier, et descouraiger les bons soubdars. — Je retoumeray, certes, dist Panurge, frère Jan, mon père spirituel, bien toust. Seulement donnez ordre à ce que ces fascheuses Andouilles ne grimpent sus les naufz. Ce pendant que combaterez, je prieray Dieu pour vostre victoire, à l'exemple du chevaleureux capitaine Moses, conducteur du peuple Israelicque.

— La dénomination, dist Epistemon à Pantagruel, de ces deux vostres coronelz Riflandouille et Tailleboudin encestuy conflict nous promect asceurance, heur et victoire, si, par fortune, ces Andouilles nous vouloient oultrager. — Vous le prenez bien, dist Pantagruel, et me plaist que par les noms de nos coronelz vous prevoiez et prognosticquez la nostre victoire. Telle manière de prognosticquer par noms n'est mo-