LIVRK IV, CHAPITRE XI.III

et restaurant d'andouilles) moururent presque toutes. Par l'octroy et vouloir du gi^and Roy feurent par monceaulx en un endroict de Paris enterrées, qui jusques à présent est appelle la rue Pavée d'Andouilles.

A la requeste des dames de la court royalle fut Niphleseth la jeune saulvée et honorablement traictée. Depuis feut mariée en bon et riche lieu, et feist plusieurs beaulx enfans, dont loué soit Dieu.

Pantagruel remercia gracieusement la Royne, pardonna toute l'offense, refusa l'offre qu'elle avoit faict, et luy donna un beau petit cousteau parguoys. Puys curieusement l'interrogea sus l'apparition du monstre susdict. Elle respondit que c'estoit l'Idée de Mardigras, leur dieu tutellaire en temps de guerre, premier fondateur et original de toute la race Andouillicque. Pourtant sembloit il à un Pourceau, car Andouiiles furent de Pourceau extraictes. Pantagruel demandoit à quel propous et quelle indication curative il avoit tant de moustarde en terre projecté. La royne respondit que moustarde estoit leur Sangreal et Bausme céleste : duquel mettant quelque peu dedans les playes des Andouiiles terrassées, en bien peu de temps les navrées guerissoient, les mortes ressuscitoient.

Aultres propous ne tint Pantagruel à la Royne, et se retira en sa nauf. Aussi feirent tous les bons compaignons avecques leurs armes et leur Truye.