A MONSIEUR BOUCHART, DOCTEUR EN THEOLOGIE

Donne response à mon présent affaire, Docte Docteur. Qui t'a induict à faire Emprisonner, depuis six jours en ça, Un tien amy, qui onc ne t'offensa.

Et vouloir mettre en luy craincte et terreur D'aigre justice, en disant que l'erreur Tient de Luther? Point ne suis lutheriste Ne zuinglien, et moins anabaptiste :

Je suis de Dieu par son filz Jesus-Christ.

Je suis celuy qui ay faict maint escript. Dont un seul vers on n'en sçauroit extraire Qui à la loy divine soit contraire.

Je suis celluy qui prend plaisir et peine A louer Christ, et sa mère tant pleine De grâce infuse : et pour bien l'esprouver.

On le pourra par mes escriptz trouver.

Brief, celuy suis qui croit, honore et prise La saincte vraye et catholique Eglise; Autre doctrine en moy ne veulx bouter : Ma loy est bonne, et si ne fault doubter Qu'à mon pouvoir ne la prise et exaulce, Veu qu'un payen prise la sienne faulse. Que quiers tu donc, ô Docteur catholique? Que quiers tu donc? As tu aucune picque Encontre moy? Ou si tu prends saveur A me trister dessoubz autruy faveur?

Je croy que non, mais quelque faulx entendre T'a faict sur moy telle rigueur estendre. Donques, refrains de ton courage l'ire; Que pleust à Dieu qu'ores tu peusses lire Dedans ce corps, de franchise interdict : Le cueur verrois autre qu'on ne t'a dict.

A tant me tais, cher seigneur nostre maistre, Te suppliant à ce coup amy m'estre.

Et si pour moy à raison tu n'es mis.

Fais quelque chose au moins pour mes amys, En me rendant par une horsboutéc La liberté laquelle m'as ostée.