PREMIERE REGLE DE LA FOY

La foy chrestienne est donc fondée sur la parolle que Dieu luy-mesme a revelée; et c’est cela qui la met au supreme rang d’infaillibilité, comme ayant pour tesmoin cette eternelle et infaillible authorité et verité premiere, qui ne peut non plus decevoir et mentir, qu’elle ne peut estre deçuë ny trompée. La foy qui n’a pas son fondement et son appuy sur la parolle de Dieu, n’est pas une foy chrestienne; d’où s'ensuit, que la purolle de Dieu est la vraye regle et un fondement de foy aux chresliens, puis qu’estre fondement et estre regle est une mesme chose en cet endroit. Mais parce que cette infaillible regle ne peut pas mesurer nostre croyance, si elle ne nous est appliquée, preschée, proposée et declarée , et qu’elle peut estre bien ou mal appliquée, preschée, proposée, et declarée, encore devons-nous avoir quelque authorité qui la confirme; et en effet, il ne suffit pas de sçavoir que la parolle de Dieu est la vraye et infaillible regle pour bien croire à salut, si je ne sçay quelle est cette parolle de Dieu, et où elle est, et celuy qui la doit appliquer, proposer et declarer. J’ay beau tomber d’accord que la parolle de Dieu est infaillible, pour tout cela je ne croiray pas que Jesus-

Christ est le Christ Fils de Dieu vivant, si je ne suis asseuré que ce soit une parolle revelée par le Pere celeste; et quand je sçauray cecy, encore ne seray-je pas hors d'affaire, si je ne sçay comme il la faut entendre; si c’est d’une filiation adoptive, à l’arienne, ou d’une filiation naturelle, à la catholique.