ARTICLE X

Du coucher.

Que les Sœurs soient promptes à se deshabiller, et tiennent tant qu'il leur sera possible leur esprit attentif au poinct qu'on

aura leu pour l’'Orayson du matin.

Qu'elles soient tres-exactes à garder l’honnesteté et saincte pudeur, ne se descouvrant en aucune façon, ny regardant leur corps nud ; et soient soigneuses qu'on ne les voye point en se levant et couchant, lorsqu'elles n’auront pas chacune leur chambre.

Qu'’elles ne sortent point de leurs cellules sans estre vestuës, sinon par quelque pressante necessité, ny sans avoir le voile sur la teste.

Estant au lict, qu’elles se souviennent que Nostre-Seigneur, et plusieurs Saincts, dormoient sur la terre froide, et combien elles sont obligées de l’aymer et le servir, puisque sa douce bonté leur donne si paternellement leurs petites commoditez.

Qu'elles se couchent en la mesme posture qu’elles feroient, si elles voyoient Nostre-Seigneur de leurs propres yeux; car veritablement il les regarde en cette action, aussi bien qu’en toute autre.

Estant couchées, elles se representeront qu’un jour elles seront ainsi estenduës dans le tombeau, et prieront Dieu qu'il les assiste à l'heure de la mort.

Qu'’elles s’essayent de s'endormir tousjours en quelque bonne pensée, parce qu'il y a un demon qui espie leur sommeil, pour l'infecter de quelque mauvaise imagination, et un qui espie leur resveil, affin de remplir leur esprit de mille vaines et inutiles cogitations. Elles porteront leurs croix la nuict, et un petit voile noir sur la teste, et une barbette.