L'ESTENDART DE LA CROIX. EPISTRE DEDICATOIRE

de leur protecteur. Son dessein est de combattre pour l'honneur de la Croix blanche, qui est l'enseigne que Dieu a dés il y a long-tems confiée à la Serenissime Maison de Savoye, à laquelle, si la valeur chrestienne des devanciers n’eust acquis ce bon-heur, il luy seroit maintenant tres-justement deu, pour le sainct zele que Vostre Altesse a tousjours eu à la foy et à la memoire de la Croix, mais particulierement quand elle a procuré si vivement et tres-doucement le restablissement de la religion catholique en ses bailliages de Thonon et Ternier, se baignant dans un sainct ayse d’y voir partout replanter les saincts estendarts de salut. Dequoy si la memoire se perdoit, la posterité seroit privée d’une des plus riches pieces des actions de nostre aage. Je sçay, Monseigneur, quelles raisons j'aurois pour n’oser pas offrir à un si grand Prince un si petit ouvrage, comme est celuy-cy; mais je n’ignore pas aussi le privilege des premices, et me promets que le bon œil que Vostre Altesse a jetté sur quelques-unes de mes autres actions ne me sera pas moins favorable en celle-cy, à laquelle je ne suis porté d’autre desir que d’estre tenu pour homme, qui est, qui doit et veut estre à jamais,