QUAND ON PEUT JOUER OU DANSER

Pour joüer et danser loysiblement, il faut que ce soit par recreation, et non par affection, pour peu de tems, et non jusques à se lasser ou estourdir, et que ce soit rarement. Car qui en fait ordinaire, il convertira la recreation en occupation. Mais en quelle occasion peut-on joüer et danser? Les justes occasions de la danse et du jeu indifferent sont plus frequentes ; celles des jeux deffendus sont plus rares, comme aussi tels jeux sont beaucoup plus blasmables et perilleux. Mais, en un mot, dansez et joüez, selon les conditions que je vous ay marquées, quand, pour condescendre et complayre à l’honneste conversation en laquelle vous serez, la prudence et discretion vous le conseilleront; car la condescendance, comme surgeon de la charité, rend les choses indifferentes bonnes, et les dangereuses, permises. Elle oste mesme la malice à celles qui sont aucunement mauvaises : c’est pourquoy les jeux de hazard, qui autrement seroient blasmables, ne le sont pas, si quelquesfois la juste condescendance nous y porte. J'ai esté consolé d’avoir leu en la vie de’sainct Charles Borromée, qu’il condescendoit, avec les Suisses, en certaines choses esquelles d'ailleurs il estoit fort severe; et que sainct Ignace de Loyola, estant invité à joüer, l’accepta. Quant à saincte Elisabeth de Hongrie, elle joüoit et dansoit parfois, se treuvant és assemblées de passe-tems, sans interest de sa devotion, laquelle estoit bien enracinée dedans son ame, que comme les rochers qui sont autour du lac de Riette croissent estant battus des vagues; ainsi sa devotion croissoit emmy les pompes et vanitez, auxquelles sa condition l’exposoit. Ce sont les grands feux qui s’enflamment au vent, mais les petits s’esteignent si on ne les y porte à couvert.