TROISIESME CONSIDERATION, SUR L'EXEMPLE DES SAINCTS

CoxsiperEz l'exemple des Saincts de toutes sortes : qu'est-ce qu’ils n’ont pas fait pour aymer Dieu, et estre ses devots? Voyez ces martyrs invincibles en leurs resolutions : quels tourmens n’ont-ils pas souffert pour les maintenir? mais surtout ces belles et florissantes dames, plus blanches que les lys en pureté, plus vermeilles que la rose en charité, les unes à douze, les autres à treize, quinze, vingt et vingt-cinq ans, ont souffert mille sortes de martyres, plutost que de renoncer à leur resolution, non seulement en ce qui estoit de la profession de la foy, mais en ce qui estoit de la protestation de la devotion, les unes mourant plutost que de quitter la virginité, les autres plutost que de cesser de servir les affligez, et consoler les tourmentez, et ensevelir les trepassez. O Dieu! quelle constance a montré ce sexe fragile, en semblable occurrence!

Regardez tant de saincts confesseurs : avec quelle force ont-ils mesprisé le monde? comme se sont-ils rendus invincibles en leurs resolutions? rien ne les en a peu faire desprendre; ils les ont embrassées sans reserve, et les ont maintenuës sans exception. Mon Dieu, qu'est-ce que dit S. Augustin de sa mere saincte Monique ? avec quelle fermeté a-t-elle poursuivy son entreprinse de servir Dieu en son mariage, en son veufvage? Et S. Hierosme, de sa chere fille Paula, parmy combien de traverses, parmy combien tant de varietez d’accidens? Mais qu'est-ce que nous ne ferons pas sur ces si excellens patrons? Ils estoient ce que nous sommes, ils le faysoient pour le mesme Dieu, pour les mesmes vertus : pourquoy n’en ferons-nous autant en nostre condition, et selon nostre vocation, pour nostre chere resolution, et saincte protestation ?