DE LA FAÇON DE PEINDRE LES CROIX

C'Esr icy une forte preuve de l'honneur et vertu de la vraye croix ; car comme parle le traitteur : « Il est aisé à recueillir que » si le bois de la croix n’a point eu de vertu ny saincteté, ce » qui n’en est que le signe ou image n'en à non plus. » Au contraire donc, si le signe et image de la croix a beaucoup de Saincteté et de vertu, la croix mesme en aura bien davantage. Preuvant donc, comme je feray dans la suite, la saincteté de l'image de la croix, je la preuve beaucoup plus, et à plus forte raison, de la croix mesme.

Or, l’on a fait les images de la croix en diverses sortes, selon la diversité des opinions qui ont esté, de la forme et figure de la vraye croix; car les uns l’ont peinte comme un grand T latin ou grec. Comme aussi se faysoit le éhau ancien des Hebrieux, duquel S. Hierosme dit qu'il estoit fait en maniere de croix. Ceux-cy ont creu que la vraye croix de Nostre-Seigneur a esté composée de deux bois, dont l’un estoit sur le bout de l’autre : et neantmoins, comme il se void encore en quelques images, ils plantoient sur la croix un autre petit baston, pour y attacher l'inscription et cause que Pilate y fit mettre. Cette-cy est l’opinion de Bede.

Les autres, estimant que les deux bois de la vraye croix se traversoient en telle sorte que l’un surpassoit l’autre, ont fait l’image de la croix en la mesme maniere, affichant l’escriteau à la partie plus haute. Et certes, il y a plus de probabilité en cecy, quand ce ne seroit que pour la commune opinion des chrestiens; et que Justin le martyr, au dialogue qu'il fit avec Tryphon, appariant la croix à la corne d’une licorne, semble la descrire en cette sorte; et S. Irenée dit que « l'habitude ou figure de la croix » a cinq bouts ou pointes, deux en longueur, deux en largeur, » une au milieu, sur laquelle s’appuye celuy qui est crucifé. »