LIVRE II, CHAPITRE IX

À cette coustume des empereurs se rapporte l’advertissement que S. Remy fit au roy Clovis :

Mitis depone colla Sicamber, Incende quod adorasti, Et adora quod incendisti,

Sicambrien gracieux, Baisse le col et les yeux, Brusle la chose adorée, Puis adore la bruslée.

C’est qu'il le veut rendre capable du christianisme, qui fait brusler les idoles et honorer la croix.

Mais à quoy, je vous prie, visoit la bravade que les payens faysoient aux chrestiens, recitée par Minutius Felix (Octav. n. 11), joint à ceux d'Arnobe : Voicy des supplices pour vous, et des tourmens et des croix, non plus pour adorer, mais pour souffrir? N’estoit-ce pas une presupposition de l’honneur que les chrestiens faysoient à la croix qui leur faysoit advancer ces parolles : Ecce vobis supplicia et tormenta, jam non adorandeæ, sed subeundæ cruces ?

En voilà bien assez pour convaincre le traitteur, qui a bien osé dire que du tems de la pure et primitive Eglise, on n’a dressé ny veneré la croix : ou bien, ce qui revient tout en un, qu'il ne luy faut porter aucun honneur religieux; car à quel autre honneur se peut rapporter ce que j'ay produict jusques icy ?