CHAPITRE XXXI

Comment Pantagruel entra en la vilie des Amaurotes : et comment Panurge maria le roi Anarche, et le feit crieur de saulce verte,

Après celle victoire merveilleuse, Pantagruel envoya Carpalim en la ville des Amaurotes, dire et annuncer comment le roi Anarche estoit prins et touts leurs ennemis deffaicts. Laquelle nouvelle entendue, sortirent au devant de lui touts les habitants de la ville en bon ordre, et en grande pompe triumphale, avec une liesse divine, et le conduirent en la ville et furent faicts beaulx feux de joie par toute la ville, et belles tables rondes, garnies de force vivres, dressées par les rues. Ce fut un renouvellement du temps de Saturne, tant y fut faicte lors grande chère.

Mais Pantagruel, tout le sénat ensemble, dist : « Messieurs, ce pendent que le fer est chauld il le fault battre : pareillement devant que nous débaucher d'advantage, je veulx que allions prendre d'assault tout le royaulme des Dipsodes. Pourtant, ceulx qui avec moi vouldront venir s’apprestent à demain après boire : car lors je commencerai marcher. Non qu'il me faille gents d'advantage pour m'aider à le conquester ; car aulant vauldroit que je le tinse desja : mais je voi que ceste ville est tant pleine des habitants qu'ils ne peuvent se tourner par les rues, doncques je les meinerai comme une colonie en Dipsodie, et leur donnerai lout le pays, qui est beau, salubre , fruc-

EE