CHAPITRE XX VIII

Comment Picrochole print d’assault la Roche-Clermauld, et le regret et difficulté que feit Grandgousier d’entreprendre guerre.

Ce pendent que le moine s’escarmouchoit, comme avons dict, contre ceulx qui estoient entrés le clos, Picrochole à grande hasliveté passa le gué de Vede avec ses gents, et assaillit la Roche-Clermauld : auquel lieu ne lui fut faicte résistance quelconque: et parce qu'il étoit ja nuict, délibéra en icelle ville se herberger soi et ses gents, et refraischir de sa colère pungitive. Au matin print d’assault les boulevards et chasteau, et le rempara très bien ; et le pourvut de munitions requises, pensant là faire sa retraicte, si d’ailleurs estoit assailli. Car le lieu estoit fort, et par art et par nature, à cause de la situation et assiète.