LA REINE ENTRE A LONDRES

décachiet la royne en sus de luy et par son enhort. Quant che dessus dit luy fut coppé , on les jetta ou feu et furent arses. Après on lui fendy le ventre, et luy osta-on son cuer et le coraille , et tout jetta-on ou feu , pour tant que il estoit faus de cuer et traîtres et que par son traître consail et enhort le roy avoit honny son royaulme et mis à meschief et avoit fait décoller les plus grans et les plus nobles de sancq de tout son royalme, dont il estoit moult afoiblis ; en après on lui copa la teste, et fut envoyé à Londres et fu mise sur le pont en ung cercle au debout d'une lanche , et puis fu esquartelés et envoyés as quatres souveraines chités d'Engleterre. Ensy fina le dit messire Hues le Despensier.

Après ceste justice faite , la roynne et messire Jehan de Haynau se partirent atout leur gens de Harfort et chevauchèrent vers Londres et esploitèrent tant par leur journées que il vinrent à Londres ; et là furent recheu à grant joye du maieur de la ville et des bonnes gens qui moult désiroient à veoir la dame et le fils le jovène Edouart. Sy rechut la foyalté des hommes de la ville laditte roynne ou nom de son fils. Assés tos après le vinrent veoir ou palais de Wesmoustier , où elle se tenoit dehors Londres , tout ly prélat et les chevaliers d'Engleterre qui encore ne l'avoient veu, et ly firent grant réverense , et ossy à che gentil chevalier monsigneur Jehan de Hainau , desquels il fu grandement honnourés. Et fu avisé et regardé que au Noël qui venoit, la roynne feroit à Wesmoustier une assemblée de tous les barons et chevaliers et prélas d'Engleterre et des consaulx des bonnes villes pour avoir avis et conseil comment on useroit de celle besoigne ; car le royalme d'Engleterre ne povoit longement" estre sans