ET DES FLAMANDS
Ysabiel fille du roy d'Eagleterre à grant chière, et monstroit par samblant qu'il avoit grant désir que le mariage se fesist, et fu là une brief journée acordée à laquelle ou devoit espouser et tenir une grant feste. Sur che se départirent.
Le roy d'Engleterre fîst faire moult grant aparel pour chelle grant feste et se pourvey de bieaux joieaulx, et la royne ossy pour donner là où il leur sambleroit estre bien emploie. Le conte' de Flandre aloit toudis veoir voiler sur la rivière en la compaignie de ceulx que le dévoient garder. Sy advint le jour devant che qu'il devoit espouser, que l'un de ses faucons ala chergier au cange, et ses fauconniers après pour le loirer. Quant le jone conte vey son fauconnier férir des espérons après son faucon, il féry ossy son cheval des esporons et s'en ala après en telle manière qu'il ne revint mie à la journée pour espouser la fille du roy d'Engleterre, ains s'en ala, quant qu'il pot, par devers le roy de Franche et devers le duc de Normendie, et en telle manière escapa-il mallesieusement des Flamens, qui en furent durement courouchiés. Ossy fut le roy englès, et s'en tint pour décheut, et le roy de Franche et les Franchois eu furent moult lies ; mais pour ce ne demora mie que les Flamens ne confortassent toudis les Englès, et vidèrent pluiseurs fois hors et furent devant Aire et devant Saint- Omer et ardirent tout le pais d'environ et le bonne chité de Térouane, et toudis en confortant les Englès.
En che tamps estoit nouvellement revenu d'oultre mer et du saint voiage de .Jhérusalem che gentil et vaillant chevalier messire Robert de Namur, fils jadis au conte Jehan de Namur. Sy estoit moult jone et se travilloit vollentiers et entendy que le roy d'Engleterre estoit devant Calais et y avoit jà esté près d'un an. Ensy s'avisa que il
XVIl. — FROISSART. 16
242 ROBERT DK NVMUU VU C\MP ANGLAIS.
riroit veoir et savoir quelle chière il luy feroit ; car ossy il n'avoit encores esté mandés, ne priés du roy Phelippe. Sy povoit bien par honneur traire devers lequel roy qui mieulx luy plaisoit ; car il ne tenoit riens de l'un, ne de l'autre, et toutesfois il estoit plus enclin au roy d'Engleterre que au roy de France. Sy se party le conte de Namur en bon arroy, ensy que toudis a fait honnorablement par le pais et par le monde, et passa parray Flandres, et esploita tant qu'il vint devant Calais. Sy ala devers messire Gautier de Mauny, pour tant qu'il estoit hainuier, lequel l'acointa du conte d'Erby et de messire Henry de Lenclastre, et cheulx le menèrent devers le roy et la royne, qui furent moult resjoïs de sa venue et le rechurent liement , et messire Robert de Namur estoit grandement en la grâce du roy et de la royne, pour le cause de son oncle messire Robert d'Artois, de qui il portoit tel nom. Si le retint le roy d'Engleterre et luy donna par an trois cens livres à l'estrelin, qui vallent dix-huit cens frans de Franche, et luy donna par telle condition que on luy pairoit , tant que il viveroit , la dite revenue à prendre aux canges à Bruges. Adont fist hommaige ledit conte au roy d'Engleterre, et le baisa en la bouche, et demeura devant Calais, tant que la ville fut rendue. Après la ville rendue, il s'en ala en Engleterre avecques le roy et la royne juer et esbatre et veoir le païs, et ossy pour aprendre à congnoistre les seigneurs et les dames du royalme d'Engleterre dont il désiroit moult de avoir l'acointanche.
Or retournons-nous à ung grant fait qui avint en celle saison en Bretaigne contre monsigneur Charles de Blois et des gens du conte de Monfort.
