DES TRENTE

estoient. Et quant il furent l'un devant l'autre , ils parlementèrent ung petit ensamble tous soixante, puis se retrairent ung petit arière ly uns de l'autre , et firent toutes leurs gens traire en sus de leur plache bien loing, puis fist ly ung d'ieaulx ung signe. Adont se commenchèrent à combatre radement tout à cop, et rescouoient li uns l'autre , quant il veoient leur compaignons à mesquief. Assés tost après che qu'il furent assamblés, fu ochis li uns des Franchois, mais pour ce ne laissèrent mie \y aultres le combatre, ains se maintinrent moult vaillaument d'une part et d'aultre ossy bien que tout fussent Rolans et Oliviers. Je ne sçay dire à le vérité qui se maintint le mieulx et qui mieulx le fesist, ne oy oncques nul prisier l'un plus avant que l'autre, mais tant se combatirent longement que tout perdirent forche et alaine et pooir entirement. Sy les convint arester et reposer par acord, li uns d'une part, et ly aultres d'autre part, et se donnèrent trièves jusques adont qu'il seroient reposet, et que le premier qui se releveroit, rappelleroit les aultres. Adont estoient mors quatre Fr anchois et deux Englès. Il se reposèrent longement d'une part et d'autre, et tel y eurent, qui burent du vin que on leur aporta en boutailles, et remirent à point leurs armes.

Quant il furent assés reposés , le premier qui se releva , fist signe et rapella les autres, Sy commencha la bataille osy fort comme devant , et dura moult longement , et avoient courtes espées de Bourdiaus , roides et agues, et espoys et dages, et ly aultres haches, et en donnoient mervilleusement grans horions , et li aultres se prenoient à bras à le lutte et se efForchoient sans yaulx espargnier. Vous poés bien croire que il faisoient entre yaulx maint bieaulx fait d'armes , gens pour gens , corps à corps, main à main. On n'avoit point en devant passet deux cens ans oy recorder la cause pareille. Ensy se combatirent comme

bons compaignons et se tinrent celle seconde fois en point moult vaillaument ; mais finablement ly Englès en eurent le pjeur ; car, ensy que je oy dire ceulx qui les virent , 11 uns des Franchois qui estoit à cheval , les débrisoit et défoulloit laidement, syque Brandebourck leur capitaine y i'u. tués et vingt de leurs compaignons, et les aultres se rendirent prisonniers, quant ils virent que leur deffense ne leur povoit aydier , qu'il ne les convenist ou rendre ou morir , car il ne se pooient , ne dévoient fuir. Et le dit messire Robert et ses compaignons, qui estoient demorés en vie, les prirent et les menèrent au Castiel-Josselin comme leurs prisonniers , et les mirent à ranchon depuis à leur voUenté , sans nulle grande constrainte. Je n'oys oncques mais dire , ne raconter que syfaite astinne, ne entreprise ne fust pour recommandée , et partout là où il venoient cheulx qui y furent et qui en escapèrent en vie , osy furent-il , il n'est pas doubte ; car bien vingt-deux ans puissedy j'en vich ung seoir à la table du roy Charle de Franche , et on l'apelloit monsigneur levain Caruel, et, pour chou que il avoit esté le un des trente, on l'onnouroit deseure tous aultres , et ousy il monstroit bien à son viaire qu'il sçavoit que cops d'espées , de daghes et de haches valloient, car il estoit moult playés. Et ossy oy-jou dire de che tamps que messire Engherans d'Uedins avoit esté avoecque en l'élection, et pour che estoit-il sy honnourés et amés du roy de Franche. Se che fu voir, il en valy mieulx , et tout chil qui y furent ; car che fut un honnourable fait d'armes , et avint entre Ploremiel et Castiel-Josselin , l'an de grâce mil IIP LI, le XXVIPdejullet.

Vous avés bien chy-dessus oy recorder comment messire Édouars de Bieaugeu, marescal de Franche, estoit en garni-