JEAN DE BEÂUMONT REVIENT EN ANGLETERRE

Haynuiers ; du païs de Flandres y vinrent monseigneur Hector Villain, messire Jehan de Robais, messire Wauffars de Gistelle , messire Guillame de Strates , messire Gossuin de la Muelle et pluiseurs autres ; du pays de Hasebain y furent messires Jehan li Biauls et messires Henri ses frères, messire Godefrois de le Capelle , messires Hues de Hay , messire Jehan de Libines , messire Lambert du Pels, messires Guillame de Hers ; du pays de Brabant , le sire de Dufle , messire Thiéry de Wallecourt , messire Rase de Grés , messire Jehan de Gasebeck, messire Jehan Pillifre, messire Gilles de Cotterebbe, ly trois frères de Harlebecque, messire Gautier de Hoteberghe et pluiseurs autres. De Cambrésis, d'Artois et de Vermendois y vinrent auchun chevaliers et escuiers sans païer pour leur corps avanchier et pour l'espérance de avoir grant proufit, ensy que devant avoient eu. Le gentil chevalier messire Jehan de Haynau se hasta dou plus qu'il peust atout sa charge, syque quant toutes ses prouvéanches furent faites, il se party de Haynau atout grant foison de belle gens d'armes et esploita tant qu'il vint à Wissant. Là trouva-il passaigiers d'Engleterre qui l'attendoient, et là séjourna deus jours tant que toutes ses gens furent prest, et passa la mer et toute sa route, et vint à che jour au port de Douvres, et là séjourna deus jours • tant que toutes ses gens furent yauls et leur chevaus rafresquy, et enquist du roy là où il estoit. On luy dit que il s'en aloit à grant esplois vers Escoche ; car les Escossois estoient entrés en Engleterre, qui ardoient le païs à grant loisir. Adont se party messire Jehan de Haynau de Douvres , et se mist au chemin au travers parray Engleterre pour venir à Ewruich , une moult riche cité séant sur le rivière de Hombre ou nort, Sy esploita tant par ses journées qu'il y vint, et toute se route , et il estoient bien cinq cens lances, et là trouvèrent