DANS LE LANGUEDOC

séant sur ung tiertre, et fu asallie, et dura l'asault ung jour toute jour, mais finablement elle fu prise, toute robée et arse et essillie , et moult avoir conquirent layens. Sy se logèrent chestuy jour environ Avignolet, et l'endemain il chevauchèrent vers Villefrance, une bonne ville et grosse , mais elle estoit maisement fretnée. Sy fu moult tost conquise par assault, et toute arse et robée sans nul déport, et moult grant avoir y avoit dedens, et tant chevauchèrent ly Englès et Gascons qu'il vinrent emprès la bonne ville de Carcasonne, qui est chief de tout le païs,

La ville de Carcasonne siet sur une rivière que on appelle Aude, et est une moult grosse ville et grande et bien marchande. Au desoubs de la ville, outre la rivière, à deux traits d'un arc , siet la chité de Carcasonne, qui est une des fortes chités du monde, car elle est assise hault , sicomme le mont de Lan, et tout sur une roche bien fremée de pierre de grés, de tours, de murs, de portes, et est ceste chité où ly empereur Charles sist sept ans anchois que il le peuist conquerre, et que anciennement on appelloit Carsaude. Dedens la chité estoit adont le sénescal, ung moult vaillant chevalier, et avoit avecques luy grant foison de bonnes gens d'armes, et quoyque la ville de Carcasonne fuist grande et remplie de bourgois et de bidauls du pays, ly riche et ly saiges hommes avoient leurs femmes et leurs enfans et leurs corps meismes enfremés en la cité, et tout chil qui ensy firent , furent saige ; car, quant les Englès furent venus à la ville par desous et il l'orent bien ymaginée et considérée, il dirent que elle n'estoit mie à tenir. Sy l'asalirent moult radement, et ly bidauls qui dedens estoient, le defFendirent che qu'il peurent , et dura ly assault ung jour tout entier. Au soir ly assallant se retrairent à leur logis , dont chelle nuit chil de la ville vidèrent grant foison de leur biens, et