EDOUARD III DEVANT PARIS

de Paris, et en y eult des mors et des navrés des ungs et des aultres, et puis s'en retournèrent les Englès sans aultre cose faire.

En che tamps estoient en Paris l'abé de Clugny, ung saige prélat, frère à Jehan de Langres, mestre en divinité, et messire Huge de Genève , vaillant homme et saige durement. Ces trois seigneurs sur bon sauf-conduit qu'il avoient, chevauchèrent adont devers le roy d'Engleterre, et puis devers le duc de Normendie , et tretoient que volentiers il euissent acordé toutes ces parties et mises à pais. Le roy d'Engleterre à che commenchement ne s'y acorda point, mais voUoit encore tenir le guerre, et avoit entention de luy aler rafreschir en Bretaigne et luy là tenir tant que les blés seroient meurs en Franche et laissier guerroier le dit royalme [parj ses gens qui tenoient garnison en pluiseurs pais et ches garnisons laissier courir tout le plat pais, dont il estoient ensy que mestre ; car les Englès en che tamps tenoient en Franche plus de quatre cens castiaulx, ne on savoit marchier en païs où Englès ne fussent amasé, lesquels honissoient les chités et bonnes villes, et estoit marchandise toute perdue parmy le royalme. Les terres demoroient toutes en arière, dont chier tamps et grant mortalités par défaulte de vivres vinrent puissedy. Et estoit le dit royalme en si petit estât, et les chités et les bonnes villes si grevées et appressées, que les saiges hommes du royalme se doubtoient qu'il ne se perdesist ; car il ne povoient longement porter telle tribulation, et pour che mettoient li dessus dit traitieur grant paine par moien que pais ou accort fust entre ces parties , par quoy les nobles du royalme de Franche qui estoient sy déisolés, fussent recouvrés ; mais à che commenchement le roy d'Engleterre, sicomme chi dessus est dit, ne y voUoit entendre.