EDOUARD III POURSUIT SA MARCHE VERS CHARTRES

Quant le roy d'Engleterre qui se tenoit au Bourch-la- Royne à deux petites lieues de Paris, vey que chil de Paris n'isteroient point hors pour luy combatre, sy se desloga et fist deslogier ses gens et prist le chemin de Chartres. En l'ost du roy d'Engleterre eust à che deslogement trois chevaliers par espésial, lesquels je vous nommeray, monsigneur Jehan de Grailly, captau de Beus, monsigneur Amenion de Pumiers et monsigneur Petiton de Courton, qui se mirent yaulx et leurs gens en esbusque ; car il supposèrent bien, [ce] qu'il avint, que aulcun chevaliers et gens d'armes qui setenoient dedens Paris, vuideroient en poursivant l'ost pour férir en le keuwe et gaignier aulcune cose. Voirement se partirent de Paris monsigneur Raouls de Coucy, le sire de Rainneval, le sire de Chambly, raessire Pierres de Saremaise, messire Flamens de Roie et messire Gauvains de Bailleul et pluiseurs aultres chevaliers et escuiers tout d'une alianche, et chevauchèrent hastivement eh poursiévant les Englès et passèrent l'embusque des susdis Gascons. Sy tost que il furent oultre, il ouvrirent leur embusque et crièrent leur cry, et se férirent en ces Franchois, lesquels furent moult esmervilliës, quant il les virent derrière yaulx. Nonobstant il retournèrent vaillaument, et là y eult des prumières venues pluiseurs rués par terre des uns et des aultres, et là eult grant hustin et dur et bien combatu. Toutesfois les Gascons et les Englès s'y portèrent sy bien et sy chevallereusement que il obtinrent la plache, et furent les Franchois presque tous mors ou pris. Petit s'en saulvèrent. Sy s'en retournèrent les Gascons et Englès atout leur prisonniers en le compaignie du roy d'Engleterre qui s'en aloit devers Chartres.

Tant esploita le roy d'Engleterre avecques ses gens que il vint à Galardon , et là se tint bien quinze jours ; car li traitieurs dessus nommés le poursiévoient que il se volsist