MORT DU ROI JEAN

d'un biel fils qui s'apelloit Edouart , à quelle relevée de madame la princhesse eult en la chité d'Angolesme moult grant feste et grant joustes de plus de IP chevaliers, et fut la dite feste moult renforchie pour l'amour du roy de Chippre.

En che tamps se départy le roy de Franche, et ala en Angleterre veoir le roy d'Engleterre et ses gens les ostaigiers qui là estoient pour luy. Sy fu recheus le dit roy Jehan très-grandement du roy englès et de madame sa femme la royne et de tous les barons, et se tint le roy à Westmoustier ung peu, et puis s'en vint tenir à son hostel en Savoie. Sy visetoient souvent l'un l'autre le roy de Franche et le roy d'Engleterre, et se acolloient en grant amour.

Environ Closes Pasques l'an mil IIP LXIIII trespassa de che siècle en l'ostel de Savoie au dehors de Londres le roy Jehan de Franche , dont le roy d'Engleterre et la royne et tout leurs enfans furent durement courouchiés ; car moult l'amoient, et par le pais faisant s'appelloient frères. Sy fu le corps du roy Jehan de Franche enbausmet et mis en ung sarcus et convoies des seigneurs de Franche jusques à Douvres et là fu mis en ung batiel. Sy ariva à Boulongne , le conte d'Eu, le conte de Dammartin, le conte de Tancarvilleet le Grant-Prieur de Franche en le compaignie, et fu ensy amené jusques à Saint-Denis en Franche où le duc de Normendie et le duc d'Ango estoient. Sy doy enfans et grant foison de prélas et de barons de Franche le requellèrent, et jà estoit le roy de Chippre revenus en Franche d'Acquitaine et fu au jour de l'obsèque dudit roy Jehan à Saint-Denis vestus de noir avoecq les enfans du roy et les prochains du linage.