BATAILLE DE COCHEREL

il veirent che convenant , en escriant : « Nostre Dame ! « Claikin ! » Adont quant les batailles se deurent asambler, se partj ly Archeprestre tous seul, mais il laissa ses gens et se banière, et dist depuis, en luy escusant, que il ne se povoit combatre en ce jour encontre le captai de Beus, Là eult grant bataille et dure et qui longement dura, et fut très-bien combatue de toutes pars, et en y eult mort de ung costé et d'aultre moult, et là furent du costé de Franche raessire Bertrans de Claikin , messire Bauduins d'Ennekins, messire Enghorant d'Uedins, messire Oudart de Renty, messire Lois de Hiveskerque, le conte d'Auchoire et le Bèghes de Velaines, et ossy des Gascons messire Amenions de Pumiers , messire Petiton de Courton, messire ly soudis de Lestrade et les gens le signeur de Labreth, et y firent chil chevalier et escuier gascon che jour pluiseurs grans fais d'armes, et tant que par leur sens et avis dou prumier de le bataille le capital fu pris ; car il ordonnèrent trente fors hommes à cheval et bien montés qui à riens n'enteiidoient fors à venir sur le captai de Beus, et de forche delés son penon. Il fu pris et toursés et portés en voies, qu'onques on ne le peult rescourre. Là obtinrent la plache les Franchois ; mais il leur cousta grandement de leurs gens, et y fut mors messire Bauduin d'Ennekins, mestre des arbalestriers, le visconte de Biaumont, messire Loys de Haveskerque et pluiseurs aultres chevaliers et escuiers, et durement navrés messire le soudis de Lestrade et messire Petiton de Courton. Sy furent mors du costé des Navarrois [li bascles de] Mareul et ung grant bannerès de Navarre, qui s'apelloit le sire de Saus, et pris messire Guillames de Gauville , messire Pierres de Saquenville, messire Bertran du Franc et pluiseurs aultres. Oncques nuls n'en escapa. Tout furent mors ou pris, et rapassèrent che soir les Franchois l'aige, et vinrent logier à Pasci et à Vernon, et l'endemain à Roem.