EXPÉDITION DU DUC DE BOURGOGNE CONTRE LES NAVARRAIS

tenoient, tels que Macerenville et Maceroles et Rouleboise. Et ossy d'autre part messire Loys de Navarre atout grant foison de gens d'armes navarrois et englès entra en Auvergne et en Bourbonnois, et estoient en se compaignie messire Robert Brickès, Jehan Cresuelle et Bernart de la Salle , et vinrent ches gens d'armes prendre et rober la ville de la Carité-sur- Loire , et y mirent une grosse garnison ; mais depuis le roy de Franche y envoia le duc de Bourgongne son frère et le connestable de Franche et ses deux marisauls monsigneur Ernoul d'Audrehem et le sire de Bieaujeu et messire Robe; t d'Alenchon et grant foison de bonnes gens d'armes de Franche qui y mirent le siège, et y eult pluiseurs grans escarnaiches et grans fais d'armes par devant la Charité.

En che tamps estoit en Franche messire Charles de Blois qui s'apelloit duc de Bretaigne, et poursiévoit grandement et tangrement le roy Charles de Franche et son consail , que il puist avoir des gens d'armes pour lever le siège de devant Auroy en Bretaigne, que messire Jehan de Monfort et messire Olivier de Clichon et aultres chevaliers de Bretaigne et sauldoiers d'Engleterre avoient asségiet. Remonstroit le duc messire Charles comment li roy de Franche prédécesseur le roy, Phelippes son oncle et le roy Jehan son cousins li avoient jadis juret et promis, (juant il le marièrent à le héritière de Bretaigne , que il luy aideroient à parmaintenir sa guerre. Le roy Charles sy se sentoit bien tenus en aulcunes manières. Sy consenty que messire Bertran de Claikin, le conte d'Auchoire, qui pour che tamps estoit en grant fleur, le conte de Joni et pluiseurs aultres chevaliers de Franche se tireroient de celle part en confortant ledit Charles de Blois.