CHARLES V TRAITE AVEC LE ROI DE ^AVARRE

Ossy s'en retournèrent en Acquitaine les chevaliers du prinche, messire Jehan Candos et les aultres,

Sy fu en chel yvier fait le mariaige du duc Jehan de Bretaigne et de l'aisnée fille madame la princhesse, que elle eult de monsigneur Thomas de Hollandes.

En chel yvier fu traitiet le pais du roy de Franche et du roy de Navarre, et y rendy messire le captai de Beus grant paine , et ossy firent les deus roynes, la royne Jehanne et la royne Blanche. Parmy celle pais et cel accort demorèrent au roy de Franche Mantes et Meulent, et le roy en che non luy rendy aultres hiretaiges et le baronnie de Monpellier qui depuis luy fu retollue.

En che tamps fu fait le mariaige du jovène sire de Couchy [avecques madame Ysabel, fille au roy Edouart], et fu quite de sa foy et de sa prison et s'en alla en chelle année en Prusse, et l'esté après il retourna eu Engleterre et espousa ens ou castiel de Windesor la dessus dite dame. Sy vous dy que as noches il y eult grant feste et grant solempnité.

En che tamps estoient les corapaignes si grandes en Franche que on ne povoit aler , ne venir de nul costé , que on ne fust pris ou desrobé ; car les guerres estoient failles, et les povres compaignons falloient à leurs saudées, lesquels avoient apris à pillier et ne s'en povoient abstenir. Sy euissent vollentiers veu le pappe et le roy de Franche que il en fuissent délivré par aulcune voie. Sy avisèrent que il y avoit ung roy en Castille, qui s'apelloit dans Piettres , plains d'austérité et de mervilleuses semilles et qui surraontoit et avoit sourmonté tous ses voisins