BATAILLE DE CASSEL

Assés tos après s'esmeut che roy Phelippe de Vallois pour venir en Flandres sur les Flamens. Adont ceulx de Bruges, d'Ippre et de le chastelerie de Bergues et de Cassiel avoient leur seigneur le conte Lois bouté hors de Flandres, et avoient les Flamens fait entre eulx ung cappitaine qui s'apelloit Clais Dennekins , outrageux homme durement. Or se tenoint chil Flamencq d'un acort et li autre sur le mont de Cassel, syque, à la complainte du dit conte , le roy Phelippes esmeut ses gens et fit un grant mandement , et vint logier à Aire et là environ et puis desoubs le mont de Cassel, et là furent les Franchois je ne say quans jours à tentes et pavillons , et après se ordonnèrent sur les camps devant les Flamens qui estoient bien quinze mille hommes, et se ordonnèrent moult orguilleusement devant l'armée du roy , qui là estoit venue sur yaulx. Et les Flamencq les prisèrent sy pau que à mervelles, et s'avisèrent ung jour, et droit à heure de nonne il se partirent du mont de Cassel tout rengiés et ordonnés , et avoient en pourpos que de venir à la tente du roy de Franche et point arester nulle part , sy aroient là esté. Sy avallèrent le dit mont sy coyement que oncques nul ne s'en donna garde. Sy furent tous jus et bien avant en l'ost , et tuèrent ung chevalier de Franche en venant, qui s'apelloit messire Renault de Lore, que d'aventure il encontrèrent. On les perchut. L'ost s'estourmy et fut en grant haste criet alarme. Adont tout chascun s'arma au plus tost que il porent.

Le conte de Haynau et messire Jehan son frère , qui là estoient atout grant compaignie de Haynuiers , lesquels estoient logiet à l'un des bous de l'ost , furent les premiers qui virent les Flamens. Sy s'armèrent incontinent, et toute leurs gens , et firent adont un très-grant secours au roy de France et as Franchois ; car, se il ne fussent sy tos venus au devant des Flamens qu'il firent et que il leur coppèrent