RETRAITE DU DUC DE BOURGOGNE

Nous retournerons au duc de Lenclastre, qui estoit logiet et aresté sur le mont de Tournehem, et fu là entre ses gens ung grant taraps ; car le duc de Bourgongne, qui bien avoit XII™ hommes d'armes, estoit au devant, et estoit ensy que tous les jours li Englès cuidoient estre combatu, et bien en estoient le duc de Bourgongne et aulcun de son consail en vollenté et ymagination, se le roy de Franche l'euist consentu, mais nanyl ; car il doubtoit sy les fortunes que il mandoit priesque tous les jours à son frère que point ne se combatesist. Finablement le duc de Bourgogne, par droit tennanche, se desloga de là, à heure de mienuit, et toutes ses gens ossy, et boutèrent le feu en leur logis, lequel feu les Englès veirent tout clèrement de là où il estoient, et s'armèrent incontinent, et se tira chascun à sa banière en ordenanche de bataille devers le tente du duc de Lenclastre ; car il cuidoient bien estre combatus, et s'esmervillèrent moult entre yauls li signeurs que che volloit estre, ne à quoy les Franchois pensoient, pour che qu'il ne tiroient avant. Et, se messire Gantiers de Mauny en euist esté crut, on fuist descendu , et les euist-on porté grant damaige.

Quant che vint sus l'ajournement, que on pooit bien veoir devant luy, les signeurs de l'ost envoyèrent de leurs courreurs pour savoir que che volloit estre. Sy raportèrent chil qui envoiet furent, que les Franchois en estoient allet, dont il se tinrent pour engigniet de che qu'il n'avoient creu le parolle de che vaillant chevalier monsigneur Gautier de Mauny. Là furent ly Englès à consail ensamble à savoir qu'il seroit [bon] de faire. Et fust ce propre jour le duc de Lenclastre venus disner en le place des Franchois, se che n'euist esté pour le feu qui encore y estoit trop grant ; mais il y vint au soir et y soupa, et tous ly signeurs de son host.