S12 COMBAT NAVAL ENTRE LES ANGLAIS ET LES FLAMANDS

En che tamps se trouvèrent sur mer la navire du roy d'Engleterre et les chevaliers de son hostel, et les nefs de Flandres qui faisoient guerre as Englès, de laquelle navire de Flandres Jehan Pieterson estoit amiral, et des nefs du roy messire Guis de Brianne, et là estoit le conte de Herfort. Sy estoient là des chevaliers du roy d'Engleterre avoecq le dit conte messire Richart de Pennebourcq, messire Alains de Bouqueselle, messire Richart de Sturi, messire Thomas Wis et pluiseurs autres, et se trouvèrent en Bretaigne en ung lieu que on dit à le Bay, et estoient là espyet les Englès qui venoient de parlementer au duc de Bretaigne. Là eult grant bataille et forte, et dura trois heures. Finablement les Englès obtinrent la plache, et furent les Flamens desconfis, et en y eult bien III' mors et noyés, et pris des plus notables, et fu pris Jehan Pietreson et admenés en Engleterre, et tous les aultres.

Sy fu le roy d'Engleterre en che tamps moult courouchiés sur les Flamens et leur fîst faire par mer grant guerre et couroient les Englès jusques devant l'Escluse et y prendoient gens, barges et avoir, dont les Flamencq estoient moult courouchiés, et s'asamblèrent les consaulx des bonnes villes de Flandres et en parlèrent au conte, syques sur chiertains articles on envoia en Engleterre des bourgois de Bruges et de Gand et des chevaliers du conte, et fu traitiet ung respit à durer dix ans.

Ossy celle saison furent trièves prises entre les Englès et Escochois durant dix ans.

Or parlerons-nous ung petit du roy de Maïogres, qui fu pris ou Val-d'Olif du roy Henry de Castille, quant il reconquist Espaigne et il desconfy le roy Piètre son frère, sycomme dist est.

Vous devés savoir que par le pourcach de la royne de