CHEVAUCHÉE DU DUC DE LANCASTRE

le ville, et là vint messire Guillame des Bordes, et y fu le sire de Bousies bon chevalier, et mirent jus environ IIIF Englès des gens messire Hue Cavrelêe, et y eult prins des chevaliers et escuiers d'Engleterre, qui furent là mené en prison, dont le duc de Lenclastre fu moult courouchiés. A ceste escarmuche fu le sire de Chin très-bon chevalier et qui de sa main se combaty moult vaillaument ; mais il y fu tant batus en ses armes que oncques depuis n'eult parfaite santé.

Sy passèrent les Englès oultre et chevauchèrent tout ensamble et point ne se desfoucoient ; car il estoient sur costière poursiévy de foison de gens d'armes de Franche, qui toutes les nuis se logoient ens es bonnes villes, et au matin se mettoient as camps et repoursiévoient moult les Englès, par quoy, se aulcuns issoient de leur ordonnanche, il estoient rencontré. Et passèrent les Englès assés près de Saint-Quentin, dont messire Jehan de Buel estoit capitaine, et vinrent les marisal et le conte de Stanfort escarmuchier à la porte : mais riens n'y gaignèrent. Sy passèrent oultre et allèrent vers Laon. Là ardirent-il le plat païs et rainchonnèrent à vivres moult terriblement, et se logèrent les deus duc au Val desoubs Laon, et là se reposèrent par trois jours tout à leur aise. Et amont sur le chité de Laon estoient bien IIP lanches de Franche , mais ne firent samblant d'avaller, ne de escarmuchier. Les Englès au quatrisme jour se deslogèrent et se mirent au chemin de Soisson ; mais oncques ne portèrent point de damaige à le terre du signeur de Couchy, [qui] pour che temps estoit hors en Lombardie et se dissimuloit par sens de l'une partie et l'autre.

Assés priés de la chité de Soisson, au dehors d'un villaige que on dit Ouchy, eut une escarmuche environ sollail levant des Franchois et des Englès en le keuwe de leur