MORT DU CAPTAL DE BUCH
anchois s'en partirent, quant il eurent fait leur monstre, et s'en vinrent de celle marée devant Calais, et là furent devant le Havre à l'entrée sept jours, dont chil de Calais estoient moult esmervilliés quelle chose il voUoient faire. Au huitième jour, les Franchois se désancrèrent et se retournèrent devers Normendie. Ensy se porta ceste saison pour yauls.
En che tamps trespassa de che siècle en le prison du roy de Franche che vaillant chevalier le capitau de Beus , pour qui les Englès euissent voUentiers donné le conte de Saint-Pol et trois bons aultres chevaliers prisonniers, et [en] fu grant parolles à Bruges, mais on ne le peult ravoir. Sy morut en prison, et le roy luy fist faire son obsèque bien et soufisaument, comme il fist à messire Ernoul d'Audrehen, qui fu en son tamps marisal de Franche et qui servi le roy de Franche moult loyalment.
Vous avés bien oyt recorder comment le sire de Goumegnies estoit capitaine de la bastille d'Ardre, et desoubs luy le tenoient pluiseurs bons compaignons , chevaliers et escuiers de Haynau et d'aultre païs, de le ducé de Gueldre et de Brabant et de JuUers, lesquels issoient souvent hors et couroient ou pais d'environ et grevoient moult chiaulx de Saint-Omer, et firent les dis compaignons pluiseurs bieau fais d'armes , et plus souvent y gaignoient que il n'i perdoient.
Or eult conseil le roy de Franche qu'il feroit un secret mandement de chevaliers et d'escuiers et les envoiroit devant Ardre ; car il avoit entendu que la fortresche n'estoit point trop bien pourveue d'artillerie. Sy fist faire par le duc de Bourgongne à Troies-en-Campaigne son mande-
PRISE D AKDRES.
ment, et se partirent les barons et chevaliers et tout les aultres de leurs hosteulx et s'en vinrent à Troies, et là estoient-il payet pour trois mois. De là il vinrent à Paris où on ne se donnoit garde et en la ville de Saint-Omer. Le duc de Bourgongne y vint à bien XXV'= [lances]. Là estoient avecq luy le conte de Genève, messire Lois de Chalon, messire Jaques de la Rivière, le sire de Vergy, messire Tibaut du Neufcastiel, messire Hues de Viane, Pierre des Bares, le sire de Sonbreraont, le sire de Poises, le sire d'Engleure, le sire de Rougemont et tout les barons de Bourgongne; et de Bretons, le sire de Clichon, le sire de Bieaumanoir, le sire de Rochefort, le sire de Rieus et messire Charles de Dignan ; de Normans et d'aultres païs assés. Sy s'en vinrent soudainement toute la compaignie, sans che que le signeur de Goumegnie en seuist riens, et se logèrent devant Ardre, et estoient pourveu de canons et de artillerie très-poissaument. Sy se mirent en ordenanche pour assallir et mirent leur canons et leurs espringalles et commenchèrent à tirer après chiaulx dedens pour yaulx assaillir et esbahir. Le sire de Goumegnies, qui se veoit nus et au bas de toute artillerie (car petitement en avoit songniet), n'estoit pas à son ayse de che que il veoit tant de gens d'armes.
En l'ost du duc de Bourgongne estoit le sire de Rainneval, cousin germain au signeur de Goumegnies, siques ils et le sire de Hangès sus aseuranches vinrent parler as bailles au signeur de Goumegnies, et commenchèrent à traitier à luy qu'il volsist rendre la fortresse saulf leurs vies ; car bien sèvent que le duc de Bourgongne avoit juret que , se il estoient pris par forche, il seroient tout mors sans merchy. Ches parolles et aultres esbahirent moult le signeur de Goumegnies, et entendy à che traitiet ; car il ne veoit confort de nul costé qu'il leurpeuisl venir. Finablement
