NAISSANCE DE LOUIS DE BLOIS

il rendy le garnison as Franchois, dont il fu moult blâmés en Engleterre, quoyque nulle lachetet il n'y euwist, et ne fut fors que par petit d'avis ; car, se il se fuist fait assalir deus ou trois fois, on n'en euist jà parlet sur son afaire, ou il se fust party de nuit, sy eust bouté le feu ens. Mais il avoit pité des povres gens de la ville : sy les mist tous ens ou traittiet, et s'en party le chevalier et chils qui avecques luy estoient, et furent conduit de monsigneur Gavain de Bailleul jusques à Calais. De là endroit vinrent bien V« hommes d'armes devant Oudruich, et furent là du merquedy au semmedy. Sy se rendirent chils de Oudruich, et puis [chils de] le Planke qui est à demy lieue de là, et puis vinrent devant Bavelinghen, sy se rendirent, et puis devant le Haye, mais les Englès s'en estoient party et y avoient bouté le feu.

Ensy en celle saison reconquist en le conté de Ghines le duc Phelippes de Bourgongne les castiauls dessus nommés, et par espésial il fist prouveir et remplir et réparer le bastille d'Ardre, ensy que pour tenir contre tous venans, et y laissa à son département à capitaines le visconte de Miauls et le signeur de Saint-Py. Chil l'eurent en garde une espasse de tamps, et puis y renvoia le roy de Franche monsigneur Guillame des Bordes, ung soutil homme de guerre et vaillant, en quelle garde la ditte bastide fu ung grant tamps. Sy le fortefîèrent les Franchois tellement et le ravitaillèrent et le prouveirent de bonne artillerie. Et depuis celle chevauchie ne chevaucha le duc de Bourgogne en celle saison plus avant ; mais s'en retourna en Franche devers le roy son frère qui ly fist grant chière, et se partirent de luy toutes gens de guerre, et s'en râla chascun en son lieu.

En che tamps ou mois de septembre fu nés Lois de Blois , fils de monsigneur Gui de Blois, signeur de Biau-