EDOUARD

Flandres que tout le païs fut englès. Et manda et escripsy au roy d'Engleterre , parmy grans consauls et traitiers qui furent entre les Flamens et les Englès , que il venist seurement en Flandres ensy que il luy plaisoit. Les Flamens le verroient moult vollentiers et moult le désiroient à veoir. Le roy d'Engleterre [ossy] moult désiroit par moien de aquerre en Flandres , en Haynau et en Brabant, des amis.

Adont fut le roy d'Engleterre moult resjoïs de l'aliance que il avoit en Flandres , et tint Jacques de Hartevelle en grant amour ; car bien savoit que c'estoit par le dit Hartevelle. Sy fist le roy d'Engleterre rendre à Flamens tout les droitures de mer et laissa courir toute marchandise parmy leur pays et remist l'estaple de laines à Bruges, qui esloingiet leur estoit , dont les Flamens en eurent grant joie.

Assés tos après le dit roy d'Engleterre s'avisa , parmy le consail et enhort qu'il eut de messire Robert d'Artois , que il vendroit prendre port en Flandres ou en Brabant, auquel les il plaisoit au duc de Brabant , son cousin , au duc de Gheldres, au conte de Mons, au marquis de Julers, au seigneur de Faulquemont et à Jaques de Hartevelle et à ceulx qui dévoient aydier à fayre sa guerre. Sy fist faire ses prouvëances grandes et grosses sur mer, et se party de Londres bien acompaigniés de contes et de barons et de chevaliers, et en sa compaignie fu madame sa femme, avecques luy messire Robert d'Artois qui s'apelloit conte de Richement. Sy esploitèrent tant que il arivèrent au havre d'Anvers , où il furent rechut à grant joie des bourgois de la ville.

Quant le duc de Brabant sceut la venue de son cousin le roy d'Engleterre, sy envoia devers luy de ses chevaliers à