LE COMTE DE HAINAUT SE REND EN ANGLETERRE

Beaumont ses oncles. Il ardirent et gastèrent et exillèrent en ceste emprise et en la Tiérache plus de quarante villes en contrevengant les despis que cheulx de Cambrésys et Cambray luy avoient fait. Et quant il eurent fait leur emprise , il retournèrent en Haynau , chergiés pluiseurs cars de drap et joyaulx. Sy se départirent là ly uns de l'autre , et prirent congiet au conte qui leur donna liement, et puis s'en râla chascun à sa maison.

Assés tos après le revenue d'Aubenton , il prist vollenté au conte de Haynau d'aller en Engleterre juer et veoir le païs de son serouge le roy d'Engleterre. Sy fist ordonner toute ses besoignes sur cet estât que pour fère che voiage, et institua son oncle messire Jehan de Haynau bally et gouverneur de tout le païs de Haynau pour en user à son entention jusques à sou retour. Tantost après ceste ordonnance, il prist congiet et monta à cheval et se party et se mist au chemin , et vint en Hollande et monta en mer ou havre de Dourdrecq et singla tant que il vint en Engleterre et ala devers le roy qui le rechut à grant joie.

Nous nous tairons ung petit du conte de Haynau et parlerons du duc du Norraendie qui mist sus une grant armée pour venir en Haynau en instanche de ardre tout le païs et asigier Vallenchienne et contrevengier les despis que les Haynuyers luy avoient fait en Terrasse.

Le roy Phelippe de Franche , sy tost qu'il oy recorder comment le conte de Haynau avoit ars et gasté son pays de Tiérasse, sy fu moult courouchiés, et dist à son fils le duc de Normendie : « Jehan, beau fils, prendés de mes gens tant