CHEVAUCHÉES DES SIRES DE WERCHIN ET DE FAUQUEMONT

fussent de nul apercheus , et ne faisoient là point de gait ; car il cuidoient estre là tout asseurés. Evous ledit sénescal et sa route qui s'en vinrent férir de plain eslais enmy le logis des Franchois en escriant : « Haynau ! Haynau ! » et le sénescal tout devant ; et s'embatirent d'aventure à ung hostel près là où le duc de Normendie estoit logiés. Sy entrèrent ens ; sy tuèrent le seigneur de Bailleul , normant, et [fiancèrent prison] le signeur de Briaulté. Sy furent assailly de grant manière. Là fu pris le sire de Briauté, et mors le sire de Bailleul. Lors Franchois se commenchèrent à estourmyr et à vidier hors de leurs hostels et alumer grant feu et torses et de venir vers l'ostel du duc de Normendie qui estoit esvilliés et s'armoit. Quant les Hennuyers eurent fait leur emprise , il se recuellèrent bellement et saigement , et puis se mirent au retour. Il ne furent point siévys. Sy laissèrent les besoignes en cel estât et enmenèrent jusques à huit prisongniers , chevaliers et escuiers , et furent au jour au Keusnoit. A l'endemain , le duc de Normendie sceut que le sénescal de Haynau les avoit resvilliés , sy le tint à grant outrayge , et dist bien que chièrement luy seroit rendu s'il venoit à point.

Sy se desloga le duc chelui jour et s'en vint logier à Sollemmes et tout contreval ches bieau prés sur la rivière de Selles.

Le sire de Fauquemont estoit pour le temps en garnison en la ville de Maubeuge. Sy avoit entendu par ses espies que les Franchois approchoient durement Haynau et qu'il estoient logiés sur la rivière de Selles. Sy party de Maubeuge atout sa compaignie , à heure de vespres, et chevaucha tant que devant minuit il vint sur la dite rivière et le