LE DUC DE NORMANDIE ENTRE EN HAINAUT

passa à nef , et ossy firent toute ses gens, et se féry , en escriant : « Fauquemont ! », ens ou logis du duc de Normendie.

Che soir faisoit le gait lé sire de Craon à cinq cens hommes. Sy se traist avant ; mais anchois qu'il peuist venir jusques as Allemans , il eulrent fait leur emprise , et demora sur la plache mort de le partie des Franchois le sire de Pickegny : de quoy le duc de Normendie fu moult courouchiés. Sy retourna le sire de Fauquemont et sa gent , et rapassèrent la rivière sans damaige , et vinrent au point du jour au Quesnoy. Sy trouvèrent là le sénescal de Haynau ; sy firent grant congnoissance.

Che propre jour , s'en vint le sénescal en son chastel de Werchin , pour le garder contre les Franchois ; car bien sçavoit qu'il estoit haïs. Et le sire de Fauquemont retourna à Maubeuge , et messire Thiéry de Wallecourt demoura au Quesnoy qu'il avoit en garde et ot garnison .

Or vous parlerons du duc de Normendie.

Le duc de Normendie fu durement courchiés de che que les Haynuiers l'avoient ensy resvilliet par deux fois et commanda au matin à toute ses gens armer et passer la rivière et entrer en Haynau. Ensy fu fait qu'il commanda. Sy s'armèrent les Franchois , et estoit marisal de l'ost le sire de Saint-Venant. Là estoit le connestable de France le conte d'Eu Raouls. Alors passèrent au matin la rivière de Selles , et se mirent au chemin pour entrer en Haynau au lés devers le Quesnoy. Sy commenchièrent les coureus à aller en pais , et estoient cinq cents lanches, et commenchèrent à ardoir tout le pais environ le Quesnoy et là en che contour en allant vers Bavay , et ardirent la